Interi dënon Naingolan, Marota nis ‘diktaturën’
Belgu, përjashtim dhe 100 mijë euro gjobë për vonesën stërvitje
Razha Naingolan nuk do të jetë në fushë ndaj Napolit. "Momentalisht, ai është i përjashtuar nga çdo aktivitet sportiv për arsye disiplinore", shkruhej në deklaratën zyrtare të klubit të Interit. Kjo ngjarje ndodhi vetëm një ditë pas barazimit zhgënjyes në Verona ndaj Kievos. Interi ishte në avantazh me golin e shënuar nga Perisiç në pjesën e parë duke humbur edhe raste të tjera të pastra për të dyfishuar rezultatin, por nuk ia arriti me anë të Zhao Marios dhe Ikardit në pjesën e dytë. Pelisier ndëshkoi zikaltrit në minutën e 92-të duke siguruar 1 pikë të artë për skuadrën e tij. Trajneri Luçiano Spaleti kishte planifikuar një stërvitje të dielën paradite, por "Ninxha" erdhi me vonesë dhe tani do të paguajë për këtë veprim të tij. Duhet theksuar se kjo nuk ishte hera e parë që mesfushori belg ishte paraqitur me vonesë në "Sunning Traning Center". Naingolan ka vazhduar të stërvitet rregullisht duke përfunduar programin e riaftësimit pas ndeshjes ndaj Kievos, por nuk do të jetë i grumbulluar për ndeshjen me Napolin ditën e mërkurë "San Siro", duke iu shtuar edhe një gjobë prej 100 mijë eurosh. Gjithçka do të mbetet për t'u parë nëse lojtari do të jetë i gatshëm për ndeshjen e fundit të fazës së parë ndaj Empolit në transfertë më datë 29 dhjetor. Ky është një moment jo i mirë për mesfushorin belg ku, përveç disa dëmtimesh në fillim, dhe gjatë sezonit e kanë detyruar atë të qëndrojë jashtë fushave dukur humbur disa ndeshje të rëndësishme me Interin në Champions dhe në kampionat. Por, tani është edhe jeta e shthurur private në klube nate mes femrave dhe alkoolit ajo që po dëmton imazhin e lojtarit. Të mos harrojmë edhe zbardhjen e disa faturave të klonuara që hodhën dritë mbi disa baste të vëna në Kazino.
LOJTARI MBYLL "INSTAGRAM"-IN
Ndërkohë, vetëm disa orë pasi u publikua ky lajm në mediat botërore, futbollisti është zhdukur nga faqja e "Instagram"-it të tij. Ai ka mbyllur llogarinë tij që, edhe pse mendohet të mos ketë lidhje me këtë ngjarje, shton dyshime të forta. Naingolan u ble me bujë nga Roma në verë dhe u mendua si një përforcim i goditur nga klubi i Interit. Por ndodhi e kundërta, lojtari nuk bindi kurrë në ato pak ndeshje me zikaltrit duke zhgënjyer tifozët e zjarrtë interistë, të cilët prisnin më shumë nga belgu.