Tërbohen Arrabal dhe Martinena, u prishen festat për një biletë
Kuqezinjtë duhet të zgjidhin shpejt situatën
Ditë vendimtare për Flamurtarin. Çështja e rrogave duket se është kthyer në një problem serioz, ashtu sikundër edhe një vit më parë. Qysh nga nisja e sezonit, futbollistët nuk kanë marrë pagat, ndërsa u tha se në momentin e kontratës lojtarëve u është dhënë 30 për qind në dorë. Gjithsesi, jemi përballë faktit se një pjesë e konsiderueshme e lojtarëve nuk kanë marrë asnjë lek nga rrogat dhe janë në pritje. Por, duket se nuk ka kohë, për shkak se edhe rregulloret e futbollit kanë një limit. Deri më 4 janar që grumbullohet ekipi, klubi është në luftë me kohën. Ekziston frika që nga mosmarrja e pagave, disa lojtarë mund ta hedhin në gjyq klubin dhe mund të dalin të lirë. Sipas rregullores, nëse lojtari ka tre muaj pa u paguar, ka të drejtën që ta ankimojë çështjen në FSHF ose FIFA. Në fakt, nuk është rasti i parë që Flamurtarit i largohen lojtarë për shkak të pagave dhe i drejtohen FIFA-s apo FSHF-së. Rastet janë me dhjetëra, ndërsa kujtojmë këtu pak vite më parë ku për shkak të pagave, lojtarët bojkotuan stërvitjen dhe u larguan në kohën që drejtoheshin nga trajneri Stanislav Levi. Ky i fundit u largua bashkë me një grup lojtarësh që kishte sjell vetë, hodhi në gjyq klubin
dhe e fitoi. Administratori i Flamurtarit, Sinan Idrizi, pranon përgjegjësitë e tij për situatën dhe premton se çështja e pagave do të zgjidhet dhe se gjithçka është një ngërç procedurial. Pas ndeshjes me Tiranën, drejtuesit u dhanë futbollistëve titullarë dhe stafit teknik nga 3 mijë euro
shpërblim për festat e fundvitit.
- Deri tani i vetmi lojtar që është larguar është Kristian Sirgi. Lojtari dhe klubi prishën me konsensus kontratën. Rumuni do të përfitojë 20 mijë euro, çka do të thotë se do të marrë gjysmën e pagave. Burime nga klubi thonë se deri më tani nuk
ka informacione se mund të largohet edhe ndonjë lojtar tjetër. Megjithatë mbetet për t’u parë nga afrime që mund të vijnë, por edhe nga situata e pagave, pasi mund të ketë ndonjë rast që t’i drejtohet FIFA-s apo FSHF-së për prishje të kontratës për shkak të mospagesave.