10 mijë euro për një pikë, Tavo: Një bravo lojtarëve
Lojtarët e Luftëtarit kanë marrë dje një premio prej 10 mijë eurosh për barazimin ndaj Partizanit dhe objektivin e arritur, që për dy ndeshjet e fundit të këtij viti të grumbullonin katër pikë. Klubi kishte caktuar një shifër prej 15 mijë eurosh në rast fitoreje ndaj të kuqve, por duke qenë se takimi u mbyll në barazim, u shpërndanë vetëm 10 mijë euro. “Panorama Sport” zbulon se zarfi me paratë u dorëzua në dhomat e zhveshjes që para ndeshjes dhe ndarja e tyre u bë në një prej restoranteve të njohura në periferi të Gjirokastrës, ku dhe lojtarët, bashkë me stafin dhe drejtuesit darkuan dje së bashku. Pas ndeshjes për gazetën foli edhe presidenti Grigor Tavo, i cili nuk e ka fshehur gëzimin për pikën ndaj Partizanit. “Natyrisht që jemi të kënaqur me barazimin, pasi e arritëm ndaj skuadrës më të mirë të vendit. Lojtarët dhanë maksimumin në fushë dhe i përgëzoj për shpirtin e garës. Të mos harrojmë se kishim përballë një Partizan kryesues, me kualitete brenda. Prandaj, të gjithë besoj jemi të lumtur pas këtij rezultati. Sa për premion, lojtarët i morën ato që u takonin. Më saktë shpërblimin e kishte Mezani në xhep”, deklaroi fillimisht presidenti bluzi. I pyetur për të ardhmen dhe çfarë planesh do të ketë klubi për muajin janar, ku dhe hapet merkatoja, Tavo u shpreh: “Nga sot s’na mbetet gjë tjetër, veçse të mendojmë për të ardhmen. Kemi planet tona, por konkretisht s’mund të them asgjë për momentin sa i përket merkatos. T’ia lëmë kohës, gjithçka duke filluar nga janari”. Ndërkohë, e sigurt është që lëvizjet nuk do të jenë të pakta, por klubi është i vendosur që boshti i skuadrës të qëndrojë, paçka se Eduard Rroca dhe Vasil Shkurtaj cilësohen të larguar nga skuadra.