Riberi i magjeps të gjithë, por mund të flasë... turqisht
Gallatasarai ka gati një ofertë për të në qershor
Frank Riberi është pa dyshim lojtari më i mirë për skuadrën e Bajernit. Francezi është rikthyer ai i kohëve të vjetra dhe po shkëlqen në fushën e lojës. Driblime dhe gola, këto janë shfaqjet e tij të fundit. Larg veseve në fillim të sezonit ku sherret me trajnerin ishin kthyer në modë. Një rini e dytë për Frank, i cili luan sezonin e tij të fundit me bavarezët. Kontrata e tij e rinovuar në majin e kaluar skadon në qershor të 2019ës dhe gjasat që ai të rinovojë sërish janë të pakta. "Të gjithë më duan", ishin fjalët e francezit pas ndeshjes ndaj Frankfurtit, ku ai shënoi një dopietë në fitoren 0-3. Dhe në fakt ka të drejtë, ky është momenti i tij. "Nëse do të vrapoj si ai kur të jem në moshën 35-vjeçare, atëherë do të jem shumë i gëzuar", u shpreh mbrojtësi bavarez Niklas Zyle. Ndërkohë, Karl-Hainc Rumenige tha para disa javësh: "Nuk ka lojtarë të vjetër, por vetëm të mirë dhe më pak të mirë". Riberi pa dyshim tani është nga më të mirët për skuadrën e Bajernit që ka arritur të kapë vendin e dytë në renditje pas Borusias që kryeson kampionatin. Edhe trajneri Niko Kovaç deklaroi se kërkon ta ketë lojtarin nën urdhrat e tij edhe në sezonin që vjen. "Ai është një djalë shumë i mirë, atë që jep për skuadrën shumë pak e bëjnë në moshën e tij. Më vjen mirë që e kemi në ekip", u shpreh Kovaç. Vetë Frank nuk përjashton një qëndrim të mundshëm në Mynih edhe për sezonin tjetër. Por, kjo nuk varet vetëm nga ai. "Nuk i dihet kurrë se çfarë mund të ndodhë në jetë", tha francezi.
NJË RIKTHIM I MUNDSHËM NË TURQI
Çfarë do të ndodhë me francezin nëse vendos të largohet nga Bajerni? Sipas asaj që shkruan "Sky", Frank mund të rikthehet në Turqi te Gallatasarai. Lojtari ka qenë pjesë e skuadrës turke nga 1 janari i 2005-ës deri në 1 korrik 2005. Në Turqi janë të gatshëm të nënshkruajnë një kontratë për një vit e gjysmë që tani në dimër. Por, lojtari duket se do të vendosë për të ardhmen e tij vetëm pasi të këtë mbaruar kontrata me Bajernin e Mynihut.