Aksionerët e rinj, Agustin Kola: Tirana do bëhet si Skënderbeu
"Ne nuk kemi krijuar asnjë problem dhe nuk do ta bëjmë deri në fund të sezonit"
Problematika e klubeve shqiptare me financat është ulur këmbëkryq dhe kush më pak e kush më shumë, po e ndien. Çështja e vonesës së pagave është bërë tashmë një "modë" fatkeqe, për të cilën lojtarët shpesh marrin si përgjigje në klubet e tyre: "E shikoni çfarë bëhet në x klub". Flamurtari është një prej atyre ekipeve që vetë drejtuesit kanë pranuar problematikën e pagesave, pavarësisht arsyes pse nuk po shpërndahen. Nisur nga kjo situatë, "Panorama Sport" kontaktoi me kapitenin e skuadrës, Tomislav Bushiç.
KAPITENI
Shumë i rezervuar në përgjigje, sulmuesi kroat ka komentuar situatën e tij financiare, por nuk ngurron që të flasë edhe në emër të të gjithë grupit të futbollistëve. Bushiç pranon indirekt mungesën e pagave, pa pranuar të komentojë as data, as afate dhe as numër të ardhurash që i mungojnë në llogari nga klubi. Ndër të tjera, në fjalën e tij, Bushiç komenton sjelljen e të gjithë lojtarëve, pavarësisht çfarë ka ndodhur deri më tani. "Dëshira jonë, e të gjithë lojtarëve, është që të qëndrojmë së bashku deri në fund të sezonit. Kemi luajtur deri tani një gjysmësezoni, duke u treguar secili profesionist dhe pa krijuar asnjë problem. Dhe për gjithçka është bërë deri tani prej secilit, këta lojtarë meritojnë që të paguhen. Ne nuk kemi krijuar asnjë problem dhe nuk do ta bëjmë deri në fund. Presim që presidenti ta zgjidhë këtë situatë dhe besojmë se do t'ia dalë për këtë shumë shpejt", ka deklaruar Bushiç për gazetën.
PRAPASKENAT
Ndeshja ndaj Tiranës ishte një prej tyre ku vetë administratori Idrizi pranoi problemet e pagave. "Këta nuk fituan se s'kanë marrë pagat", u përgjigj Idrizi me ironi, i pyetur nga "Panorama Sport pas ndeshjes. Përpara zhvillimit të takimit me bardheblutë, vetë kapiteni i Flamurtarit dhe administratori janë takuar mes tyre. Gazeta ka mësuar nga burime pranë klubit vlonjat se tema e bisedës ka qenë edhe çështja e financave lidhur me afatet se sa kohë do të zgjasë kjo problematikë. Gazeta ka mësuar se periudha e pushimeve do të jetë edhe afati përfundimtar, i nënkuptuar, pasi me datën 4 janar kur skuadra do të rikthehet në stërvitje, secili do të bëjë një zgjedhje në varësi të pagesës nëse klubi do ta ketë zgjidhur diçka të tillë. Më katër janar do të shihet edhe sjella e vetë lojtarëve, në rast se klubi nuk do të ketë zgjidhur çështjen e financave.