Java e Bylisit, Vllaznia nis sërish shkëputjen

Me "derbin" Apolonia-Lushnja u mbyll edhe java e fundit për këtë vit. Vllaznia është kthyer sërish në +7 pikë nga ndjekësi më i afërt që është Erzeni. Shkodranët kanë kaluar me shumë lehtësi sfidën ndaj Veleçikut duke fituar me rezultatin e pastër 2-0. Një ndeshje e lehtë për Vllazninë që ka siguruar një 3pikësh shumë të rëndësishëm duke e mbyllur vitin në mënyrën më të mirë. Koplikasit e kanë pasur të vështirë ndaj shkodranëve, ndërsa gjithçka ka shkuar në mënyrën e duhur. Erzeni është ndaluar një barazim 1-1 në Lezhë ndaj Besëlidhjes. Shijakasit e kanë parë veten në disavantazh në minutat e para, por kanë arritur të barazojnë në pjesën e dytë. Lezhjanët mbeten shumë mbrapa vendit të parë dhe tashmë ngjitja në Superiore është sërish një ëndërr. Dinamo është rikthyer te fitorja pas dy humbjeve radhazi. Blutë kanë fituar lehtësisht me rezultatin 30 ndaj Shënkollit një sfidë të dominuar plotësisht prej tyre. Kryeqytetasit kanë bërë një ndeshje shumë të mirë ku Markovanbasten Çema ka shënuar dy gola. Ndërsa, Shënkolli tregon edhe një herë se ndeshjet jashtë e ka shumë të vështirë t'i përballojë. Lezhjanët kanë pësuar shtatë humbje në po kaq takime që kanë luajtur jashtë fushe këtë sezon. Dënimet e shumta të titullarëve e kanë penalizuar ndjeshëm skuadrën, e cila duket se do të luftojë fort për t'i shpëtuar rënies nga kategoria. Korabi ka marrë një fitore shumë të rëndësishme në fushën e vet, ku ka mundur Ilirinë me rezultatin 1-0. Një sfidë e dominuar nga dibranët ku Griseld Lika vendos ndeshjen me eurogolin e shënuar nga goditja e dënimit në fillim të pjesës së dytë. Burreli fiton duelin e mbijetesës me Vorën e vendit të fundit. Një ndeshje ku matjanët shënojnë dy gola dhe tashmë janë me pikë të barabarta me fushë-krujasit. Lufta për mbijetesë do të jetë shumë e fortë. Në Grupin B, java e fundit e vitit ka folur plotësisht për Bylisin që është shkëputur me katër pikë nga ndjekësi më i afërt që është Besa. Ballshiotët fitojnë lehtësisht në transfertën e Elbasanit me rezultatin 4-1 në një ndeshje ku nuk e diskutuan triumfin për asnjë moment. Besa është ndalur në një barazim pa gola në takimin e luajtur në Kavajë ndaj Orikumit. Verdhezinjtë kanë fajësuar gjyqtarin për atë rezultat duke pretenduar për dy penallti të padhëna dhe një gol të pastër të anuluar. Në fund, treshes së gjyqtarëve iu është dashur të qëndrojë për rreth 10 minuta në mesin e fushës, për shkak të protestave të zyrtarëve të Besës. Tomori e ka mbyllur në mënyrën më të keqe të mundshme vitin duke u mundur në fushën e vet nga Egnatia. Edhe pse beratasit kanë kaluar të parët në avantazh, më pas gjithçka është përmbysur dhe Egnatia ka siguruar një 3-pikësh të rëndësishëm. Në fund të ndeshjes, trajneri i Tomorit, Bledar Devolli, ka dhënë dorëheqjen. Lushnja dhe Apolonia nuk ka prodhuar fitues ku në "derbin" e luajtur të dielën pa tifozë, asnjë prej skuadrave nuk ka arritur të shënojë. Në fund të pjesës së parë të kampionatit, diferencat mes skuadrave janë rritur disi, ku Lushnja është nëntë pikë mbrapa Bylisit të vendit të parë. Pogradeci ka shfryrë ndaj Turbinës duke e mundur thellësisht 5-1.