Juventus, sulm total për Iskon dhe Ramsejn
Mesfushori i Realit i pakënaqur me Solarin, gati që të "përqafohet" me Ronaldon
Poshtë pemës së Krishtlindjeve, Maks Alegri mund të gjejë dy dhurata. Ose më saktë dy kontrata... Skuadra e Juventusit është duke bërë gjithçka për të përmirësuar ndjeshëm cilësinë në mesfushë dhe për të afruar futbollistë me "këmbë" të zgjuara. Isko Alarkon dhe Aron Ramsej janë dy objektivat e "Zonjës së Vjetër", e cila po përdor një strategji të ndryshme për të afruar dy mesfushorët.
RAMSEJ SI XHAN- Për të arritur tek uellsiani i Arsenalit do të përdoret e njëjta strategji si ajo me Emre Xhanin. Drejtuesit bardhezinj duan që ta arrijnë marrëveshjen në këto momente për ta transferuar në merkaton e verës. Lojtari nuk do ta rinovojë kontratën me Arsenalin dhe është një nga më të kërkuarit. Kampionët e Italisë duan të shfrytëzojnë prezencën e Kristiano Ronaldos dhe projektit për të fituar Ligën e Kampionëve, në mënyrë që të afrojnë Ramsejn. Por për këtë të fundit ka shfaqur interes edhe Interi, Milani dhe shumë skuadra të tjera në kampionatin anglez. Paratiçi ka nisur kontaktet për ta bindur dhe për t'i ofruar një kontratë të majme, pavarësisht se për momentin nuk ka shifra.
ISKO, I PAKËNAQURKampionët e Italisë duan që të përfitojnë nga problemet që ka Isko me Realin e Madridit për ta transferuar në Itali. Mesfushori "galaktik" është jashtë planeve të trajnerit Solari dhe nuk ka ndërmend që të vazhdojë të qëndrojë në Spanjë. Kjo gjë u jep shpresë tifozëve bardhezinj, por duket se nuk është aspak e lehtë për të bindur Florentino Perezin. Isko dhe Ronaldo kanë marrëdhënie të shkëlqyer me njëritjetrin, por në fakt presidenti e konsideron si të paprekshëm dhe klauzola e tij është 700 milionë euro. Por, nëse vetë Isko vendos që të largohet, atëherë do të joshej nga aventura italiane, aty ku futbolli është taktik dhe atij i pëlqen shumë që të punojë në këtë aspekt. Lajmin e bën të ditur "Tuttosport" që shkruan se edhe Ramsej dhe Pogba janë alternativa që duhen shfrytëzuar mirë në merkaton e janarit.