Kastrioti “divorcohet” me Kukën

Pas largimit të trajnerit është radha e portierit

Te Kastrioti nuk ka asnjë reagim pas deklaratës së dorëheqjes së trajnerit Stavri Nica, i cili pas humbjes me Kukësin deklaroi se nuk do të vazhdonte më me krutanët. Klubi ende nuk ka dalë me deklaratë për shkëputjen e marrëveshjes me teknikun, por ditën e djeshme në rrjetin social "Instagram"" krutanët kanë zyrtarizuar shkëputjen e marrëveshjes me portierin Klajdi Kuka, i cili ka qenë titullar në plot 14 ndeshje në dy fazat e para të sezonit. Kuka ka qenë një titullar absolut edhe në sezonin e shkuar, duke dhënë një kontribut të madh në ngjitjen e skuadrës në Superiore, por gjatë këtij sezoni ka pasur disa herë "ftohje" me drejtuesit dhe ajo që i dha "goditjen finale" bashkëpunimit mes tyre ishte ndeshja me Tiranën, në të cilën portieri u zëvendësua në pjesën e dytë. Tashmë, palët e kanë parë të arsyeshme të ndërpresin bashkëpunimin dhe është vetë klubi krutan, i cili njofton ndërprerjen e bashkëpunimit me gardianin tiranas: "Është mbyllur me konsensus marrëveshja me portierin Klajdi Kuka, i cili prej ditës së sotme (djeshme) është lojtar i lirë. KS Kastrioti e falënderon për kontributin e dhënë dhe i uron suksese në karrierë" shkruhet në postimin e krutanëve. Ky nuk është largimi i vetëm i krutanëve, pasi më parë janë larguar edhe pesë lojtarët e huaj, greko-sudanezi Rrahim, spanjolli Galego, si edhe tre kamerunasit, Preston, Nkembe dhe Duval. Mbetet të shihet se çfarë do të ndodhë në ditët në vijim, pasi pritet që krutanët të kenë ndryshime rrënjësore në skuadër. Skuadra nuk pushon - Pushimet për krutanët do të vijojnë vetëm në ditët e festave, kjo pasi ditën e nesërme skuadra të zbresë në fushë për t'u stërvitur. Sakaq, mësohet se lojtarët e Kastriotit kanë arritur që me kontributin e të gjithë lojtarëve të grumbullojnë një fond (çek), të cilin do ta përdorin për bamirësi te ndonjë familje e varfër në qytet në prag të festave të fundvitit.