Kukësi, një bomber nga Shkupi për sulmin

Golashënuesi më i mirë në kampionatin qipriot, Berat Sadik, është në bisedime me klubin

Kukësi nuk ka arritur ende të firmosë kontratën me Vasil Shkurtajn, paçka se dy klubet (Kukësi dhe Luftëtari) kanë arritur marrëveshjen për shitjen e sulmuesit (70 mijë euro në arkën e gjirokastritëve). "Panorama Sport" mëson se palët janë në negociata të avancuara, por shkas për zvarritjen e transferimit është bërë rritja...

Kukësi nuk ka arri tur ende të firmosë kontratën me Vasil Shkurtajn, paçka se dy klubet (Kukësi dhe Luftëtari) kanë arritur marrëveshjen për shitjen e sulmuesit (70 mijë euro në arkën e gjirokastritëve). "Panorama Sport" mëson se palët janë në negociata të avancuara, por shkas për zvarritjen e transferimit është bërë rritja e kërkesave të Shkurtajt. Mësohet se shtatlarti me origjinë nga Vlora që prej dy sezonesh është pjesë e Luftëtarit, nuk ka rënë dakord për disa pika të kontratës dhe ka vënë si kusht ndryshimin e tyre. Shkurtaj merr një pagë prej 6.2 milionë lekësh të vjetër në muaj te Luftëtari, ndërsa Kukësit i ka kërkuar 9 milionë lekësh të vjetër në muaj. Më shumë se paga, duket se palët s'janë në një mendje për disa klauzola, penalitete dhe bonuse. Që pas ndeshjes Luftëtari-Partizani, sulmuesi ka udhëtuar drejt Greqisë, aty ku jeton edhe familja e tij. Mirëpo, pritet që brenda këtyre ditëve të kthejë një përgjigje përfundimtare. Te Kukësi janë të bindur se do të firmosë, por asgjë nuk mund të quhet e sigurt. "Me çmimin që morëm Shkurtajn, ne kishim gati një sulmues nga Qipro. Por duke qenë se nuk është i huaj, zgjodhëm që të merrnim Shkurtajn. Bëhet fjalë për një lojtar që ka bërë shumë gola", deklaroi pak ditë më parë presidenti Safet Gjici. Por, dje "Panorama Sport" zbuloi ekskluzivisht se bëhet fjalë për sulmuesin shqiptar nga Maqedonia, Berat Sadik, i cili është aktualisht golashënuesi më i mirë i Superligës qipriote. 32-vjeçari që ka nënshtetësi finlandeze është pjesë e skuadrës Doksa Katokopia dhe në 11 ndeshje ka realizuar 12 gola në pjesën e parë të këtij sezoni. Sulmuesi që ka luajtur edhe me kombëtaren e Finlandës, e gjithashtu për skuadra si Arminia Bielefeld në Bundesligë, Zulte në Belgjikë dhe Thun në Zvicër, ka pranuar të futet në bisedime me Kukësin dhe i ka pëlqyer oferta. Mirëpo, në këtë moment gjithçka është pezull prej Shkurtajt. Nëse vlonjati refuzon, atëherë Berat Sadik me shumë mundësi do të jetë goditja e Kukësit.