Trajneri Toska: Shtërmeni do stërvitet edhe në ditë festash

Ekipi i peshëngritjes së Shtërmenit, edhe pse në ditë festash, po vazhdon pa ndërprerje stërvitjen. Djemtë e fshatit të vogël me talente të mëdhenj nuk njohin pushime, kështu dhe ditën e vitit të ri ata do të vazhdojnë përgatitjet e përditshme. Trajneri i palodhur i ekipit të Shtërmenit Leonard Toska e ka komentuar kështu këtë fakt: "Siç po e shihni dhe vetë, ne po stërvitemi intensivisht, edhe pse nuk kemi garë tani afër. Pra, tek ekipi ynë ka vetëm punë dhe nuk ka vend për fjalë. Kështu, ne do vazhdojmë stërvitjen edhe në datën 31 dhjetor. Kjo mund t'iu duket të gjithëve çudi, por ne si skuadër kështu procedojmë gjithmonë në të gjitha vitet. Që do të thotë se kemi një planë pune ndonëse të veçantë, por që na ka dhënë gjithmonë fryte te rezultatet. Këto të fundit i kemi shumë merak dhe për këtë gjë po stërvitemi çdo ditë. Edhe shtangistët që kam janë pajtuar me faktin, se për fat të keq nuk do të kemi asnjë ditë pushim. Ne do stërvitemi fortë dhe do të japim maksimumin në çdo ditë, pasi në vitin që vjen na presin gara të rëndësishme. Unë iu urojë të gjithëve gëzuar festat e fundvitit dhe sa më shumë mbarësi në 2019. Nuk mund të harroj pa falënderuar presidentin e federatës, Theodhor Masllavica,për mbështetjen e madhe që i ka dhënë gjithmonë klubit tonë, si dhe kryetarin e Bashkisë Cërrik, Aktin Toska, që na ka mbështetur financiarisht. Si përfundim, ne do të synojmë vitin tjetër sa më shumë rezultate të larta si ekip dhe të përfaqësoj me sportistët e mi peshëngritjen shqiptare në arenat europiane dhe botërore", deklaroi trajneri i ekipit të Shtërmenit Leonard Toska.