Mema, miqësore me të rinjtë për ndonjë lojtarë me vlerë
Bardheblutë, gjysmakë në stërvitje
Ardian Mema është në kërkim të ndonjë elementi të vlefshëm për ekipin e parë në prag të minifazës përgatitore të janarit. Prej dy ditësh, Mema ka grumbulluar më shumë se 15 të rinj dhe së bashku me Dokën, Imamin, Hoxhallarin, Turtullin, Grecën e ndonjë tjetër kanë organizuar dy miqësore me këta vocërrakë. Në dy takimet nga 60 minuta, Mema ka parë nga afër talentet, të cilët mund të jenë pjesë solide e ekipit të parë, duke filluar me ata që ka në skuadër si Muçi, Dingu, Stafa, Çelhaka, Ismailgeci dhe ndonjë tjetër. Mema kërkon përqendrim - Edhe pse luajnë kundër ekipit të parë, Mema u ka kërkuar djemve të rinj që të luajnë fort. Disa herë trajneri ka ndërprerë stërvitjen dhe ka këshilluar djemtë e vegjël të luajnë më shpejt, më mirë dhe të jenë të vendosur. Në shumë raste këshillat ishin: "luani shpejt dhe fort", apo "pozicionohuni mirë". Si ai dhe ndihmësit kanë vëzhguar me imtësi të gjithë lojtarët e rinj, duke mbajtur shënimet përkatëse për çdo të ri. Janë disa emrat që mund t'i interesojnë Memës, por trajneri
ende nuk e ka ndarë mendjen se cilët prej të rinjve do të mbajë në ekip. Fakt është që shumë futbollistë të rinj Tirana ka pasur në grup, por veç Muçit asnjë tjetër pothuajse nuk e ka prekur fushën e lojës. Për më tepër që tani Mema shpreson te filozofia e të rinjve, duke lënë në plan të dytë afrikanët që gjithmonë kanë dështuar...
Mungesat - Skuadra e Tiranës në fakt nuk kishte pothuajse gjithë bërthamën. I vetmi nga të vjetrit që bënte stërvitje veçmas ishte Dorian Kërçiku. Pjesa tjetër e ekipit, duke filluar nga kapiteni Erando Karabeci e deri te të huajt nuk ishin në stërvitje. Dihet që të gjithë ata që nuk jetojnë në Tiranë kanë shkuar në shtëpi, ndërsa një pjesë e futbollistëve ka marrë leje te trajneri Ardian Mema për të pushuar më shumë.