Kamza huazon sulmues nga Meksika, dilema për Roloviç

Skuadra e Kamzës, përveç stërvitjeve të përditshme, krahas tyre po mundohet të zhvillojë edhe një merkato cilësore për mbijetesën. Presidenti i klubit, Naim Qarri, bën me dije se është arritur marrëveshja me futbollistin meksikan, David Izazola, që pritet t'i bashkohet skuadrës në janar në fazën përgatitore, e cila do të zhvillohet në Itali pas datës 7 janar. Sipas kreut të klubit, ky lojtar do të jetë i huazuar vetëm për pjesën e mbetur të kampionatit. Lojtari në fjalë është 27 vjeç dhe 1.81 m i gjatë. Ai ka një CV të pasur kryesisht në kampionatin meksikan. Sipas "transfermarkt", vlera e kartonit të tij është 400 mijë euro. David Izazola Ramírez (i lindur më 23 tetor 1991, në Meksiko Siti) është një futbollist meksikan profesionist që luan si sulmues. Ka luajtur me shumë skuadra meksikane. Më 16 qershor 2016, në moshën 24-vjeçare, Izazola shpalli daljen e tij nga futbolli profesionist. Ai botoi një letër, duke cituar "trajtimin e keq ndaj lojtarëve të futbollit meksikan" si arsyen e daljes në pension të parakohshëm. Megjithatë, më 24 dhjetor, ai braktisi pensionin dhe nënshkroi për klubin Guatamelan Comunicaciones. Më 29 janar 2018, Izazola nënshkroi për klubin spanjoll Salamanca CF, me të cilin shënoi vetëm një gol në 11 ndeshje, duke bërë transferimin në Segunda Division B. Më 26 shtator, ai u bashkua me klubin indian të Ligës së Parë, "ILeague Churchill Brothers", me të cilin e prishi kontratën e tij dhjetë ditë më vonë pas mbërritjes në Indi më 15 tetor, duke përmendur "kushtet socialo-ekonomike të vendit". Tashmë, David Izazola do të jetë lojtari më i ri i Kamzës. Ndërkohë, sulmuesi malazez, Ognjen Roloviç, me shumë mundësi do të largohet nga Kamza pas ardhjes së meksikanit.