Tirana do një "play-maker"
Nuk është ndonjë lajm që Tirana kërkon të marrë ndonjë lojtar nga Luftëtari. Lajm është që bardheblutë duan një "play-maker". Ky është synimi i bardhebluve këtë merkato janari. Trajneri Ardian Mema ka vënë alarmin për një futbollist, i cili mund të luajë topin dhe që sipas tij nuk e ka në ekip, por që duhet me patjetër. Me Rrocën që shkoi te Kukësi, Tirana shënjestron një tjetër "gjirokastrit". Momentalisht, disa nga njerëzit afër Tiranës, që merren direkt me merkaton, të cilët po monitorojnë situatën, që duhet thënë është shumë e nderë te gjirokastritët dhe nëse shpërbëhen, mund të kthehen në "supermarketin" më të madh të lojtarëve në këtë merkato janari. Behar Ramadani është lojtari bazë i Luftëtarit, i cili pëlqehet nga bardheblutë. 28vjeçari ka luajtur 16 takime dhe ka në këmbë 1332 minuta. Shkatërruesi klasik, që i mungon Tiranës prej largimit të Saimir Patushit nga ekipi, por që luan edhe mirë me topin, mund të jetë alternativa e bardhebluve dhe e Memës. Problemi i vetëm është dëmtimi në takimin e fundit dhe Tirana nuk dëshiron futbollistë që duan kohë të riaftësohen si dhe dëshira e vetë lojtarit. Po kështu, nëse nuk ia dalin me Ramadanin, gjasat janë që Tirana të shohë nga kreu i rajonit ose futbollistët që do të mbesin pa kontratë këtë merkato janari. Pritet që në janar të ketë revolucion emrash nga "garda e vjetër", me Tiranën që prej këtyre takimeve është duke menduar për skuadrën e 2019-ës dhe të sezonit të ardhshëm. Aktualisht, disa nga "të vjetrit" janë në stol dhe nuk është çudi që ndonjëri prej tyre të prishë edhe kontratën me bardheblutë.