Super-Lejkërs triumfojnë ndaj kampionëve të Golden Stejt
Ndeshjet e djeshme në NBA, ashtu siç pritej, dhuruan spektakël në parket. Takimi më interesant i Konferencës së Perëndimit ishte ai ndërmjet Golden Stejt dhe Los Anxhelos Lejkërs. Skuadra e "mbretit" Xhejms e dominoi ndeshjen, duke fituar 127-101 ndaj kampionëve në fuqi. Kështu, Lejkërs arritën ta thyejnë në transfertë Golden Stejt pas plot 6 vitesh. LeBron Xhejms ishte në një mbrëmje të shkëlqyer ku arriti të realizojë 17 pikë, duke rikuperuar edhe 13 topa në tabelë në aq minuta sa u aktivizua, pasi fatkeqësisht nuk arriti që ta përfundonte ndeshjen për shkak të një dëmtimi. 7 lojtarë arritën të shënojmë mbi 10-pikë për Lejkërs, duke treguar një shumë të mirë në grup, me Zubak (18 pikë e 11 rikuperime në tabelë), Rondo (15 pikë dhe 10 asiste) dhe Kuzma (19 pikë). Kështu, ekipi nga Los Anxhelosi tregoi edhe njëherë tjetër që ka si pikën më të fortë lojën në grup. Ndërkohë, për Golden Stejt protagonist ishin të zakonshmit Kërri dhe Durant, respektivisht me 23 dhe 21 pikë të realizuara. Në këtë sfidë, Lejkërs lëshuan një sinjal të fortë, duke hedhur fuqishëm edhe ata kandidaturën e tyre për fitimin e titullit. Ndërkohë, në Konferencën e Lindjes patëm gjithashtu një përballje ndërmjet dy skuadrave që synojnë kreun, ku Boston arriti të triumfojë ndaj Filadelfias me rezultatin 121-114. Sëlltiks ishin thuajse gjatë gjithë kohës në avantazh, por në fund rrezikuan shumë, ku madje edhe mund të kishin humbur sfidën. Megjithatë, diçka e tillë nuk ndodhi, kjo falë edhe një Irving të jashtëzakonshëm, i cili realizoi 40 pikë dhe 10 rikuperime në tabelë, duke i dhënë suksesin në kohën shtesë Bostonit. Për Filadelfian më i miri ishte Embit, me 34 pikë dhe 16 rikuperime në tabelë. Jutah Xhaz fitoi ndaj Portland 11796, falë lojës shumë të mirë të Mitçell (19 pikë). Sukses regjistroi edhe Hjuston, pasi mposhti 113-109 Oklahoman, në një sfidë të vendosur në minutat e fundit. Diferencën për Hjuston e bëri Harden, i cili ishte i papërmbajtshëm me 41 pikë. Miluoki nuk e pati aspak të vështirë të thyente në transfertë Nju Jorkun 109-95.