Jorgji dhe Avdo, arbitrat më të mirë të vitit
Vlerësimet e Shoqatës, Enea bën “dopietë” çmimesh
Ata janë skuadra më e kontestuar dhe komentuar. Jo për premiot apo çmimin që fitojnë, porse për vetë drejtësinë që mbajnë në garën futbollistike në vend. Arbitrat shqiptarë kishin momentin për të festuar. Një mbrëmje modeste mes një rrethi miqsh dhe kolegësh, ishte organizuar nga Shoqata e Bashkimit të Arbitrave Shqiptarë të Futbollit në bashkëpunim me Komitetin e Arbitrimit. Në fjalën e tyre, sekretari i përgjithshëm, Shulku, vlerësoi kontributet e secilit, si dhe paraqitjen pozitive për këtë vit, njësoj si edhe presidenti i shoqatës, Tahir Kastrati, apo disenjatori i gjyqtarëve, Sokol Jareci.
- Enea Jorgji plotësoi “dopietën” për vitin 2018. Arbitri ndërkombëtar me stemën e FIFA-s, që këtë vit ia doli të kapërcejë si kurrë më parë kufijtë në nivelet e arbitrimit për arbitrat shqiptarë, duke gjykuar dy herë në Ligën e Kombeve dhe për herë të parë në grupet e Europa Ligës, u vlerësua me çmimin “Arbitri më i Mirë”. “Është çmim edhe më i merituar ky nga kolegjiumet e arbitrave sesa ai i dhënë nga votat e klubeve, pasi ka vlera profesionale”, u shpreh ndër të tjera Jorgji në fjalën e tij në event. Gjyqtari i kolegjiumit të Elbasanit u vlerësua edhe në mbrëmjen e fundvitit të FSHF-së si “Arbitri i Vitit”. Një tjetër vlerësim i mbrëmjes shkoi për asistentin me stemën e FIFA-s, Rejdi Avdo. Anësori i kolegjiumit të Tiranës, nuk i shpëtoi as batutës së disenjatorit Jareci. “Rejdi do të ketë një djalë së shpejti. Nga familja Avdo, një tjetër asistent arbitër është në pritje”, ishte batuta miqësore dhe urimi i Jarecit për familjen e arbitrit kryeqytetas, i cili ishte anësor në ndeshjen e fazës së grupeve në Europa Ligë.
– Më përjashtim të Avdos, që mbajti fl- amurin e kolegjiumit të kryeqytetit, pjesa tjetër e çmimeve i takuan kolegjiumit të Elbasanit. Krahas Jorgjit, edhe pjesa tjetër e nderimeve u shkuan arbitrave nga ky kolegjium. Emanuela Rusta u vlerësua si “Arbitrja më e Mirë”, ndërsa Olsi Yzeiraj dhe Uran Kora u vlerësuan me çmimet e “Perspektivës” respektivisht për kryesorë dhe anësorë.
- Në një kolektiv miqsh, sigurisht që nuk mund të mungonin ngacmimet apo batutat miqësore. Jareci, shumë i përpiktë, ishte ndër të parët në ambientet ku u zhvillua ceremonia. Dhe me mbërritjen e gjyqtarëve, njëri pas tjetrit, i drejtoheshin atij për ta takuar në fillim. “Nuk jam unë i pari i dasmës. S’e keni detyrim ta nismi me mua serinë e takimeve”, ishte batuta e ish-arbitrit të FIFA-s, për të krijuar situata miqësore dhe gazmore me gjyqtarët e pranishëm.