Lenjani: Panuçi ka provuar shumë, pres shansin tim

“Nuk kemi rezultate si me De Biazin, ja ndjesia për Kosovën”

Një dëmtim së fund mi e ka lënë jashtë fushave të lojës me Sion, por pas periudhës së festave të fundvitit, Ermir Lenjani do të jetë i gatshëm për të bërë bomberin dhe asistmenin e skuadrës zvicerane. Me trajnerin e ri në ekip, mesfushori kuqezi është vendosur si sulmues i dytë pas Pajtim Kasamit. Lenjani, në një rrëfim për emisionin “Mysafiri i Mëngjesit” në “RTK”, tregon për aventurën e tij te Sioni në Zvicër, si edhe eksperiencën me trajnerin Panuçi në Kombëtare.

SIONI - “Në fillim patëm një trajner zviceran te Sioni, nuk patëm rezultate. Tani presidenti solli një trajner turk dhe na ka ecur shumë mirë. Edhe mua personalisht, kam ndërruar edhe pozicionin, jam sulmues tani. Unë e kam në mbrojtje dhe mesfushë pozicionin natyral”.

ROLI “BOMBER” – “Ne nuk po shënonim gola, krijonim pak aksione. Unë isha më i shpejti në testet e skuadrës dhe trajneri më tha: ‘Je sulmuesi i dytë që tani, me Pajtim Kasamin’. Tani, unë po jap akoma më shumë asiste”.

AMBIENTIMI NË SULM – “Shumë herë gjatë ndeshjes më bie në mendje të kthehem mbrapa dhe në fillim e bëja diçka të tillë pa vetëdije dhe kthehesha menjëherë në mbrojtje. Mirëpo, trajneri më thoshte rri përpara ku të kam thënë. Në fillim e pata pak të vështirë, por tani jam ambientuar me pozicionin e ri”.

SHQIPTARËT NË ZVICËR – “Në Zvicër ka rreth 20-25 futbollistë me origjinë shqiptare. Para ndeshjeve bëjmë shaka dhe shkruajmë me njëri-tjetrin. Ngacmohemi se kush do fitojë”.

JETESA – “Me rikthimin në Zvicër jam më rehat. Kam familjen dhe shokët aty. Në Francë ishte më e vështirë, sepse në shumë raste isha vetëm. Kurse në Zvicër i njoh të gjithë dhe e përsëris se jam shumë rehat”.

KOMBËTARJA DHE PANUÇI – “Unë u bëra 5 vite te Shqipëria. Tani në ndeshjet e fundit nuk kemi pasur shumë rezultate të mira si me De Biazin. Panuçi ka filozofinë e tij, si çdo trajner tjetër. Me Panuçin kam luajtur shumë pak, nuk më ka dhënë shumë pak shanse dhe nuk e di tamam a mund të luaj edhe këtu në sulm siç po bëj te Sion. Trajneri ka thirrur shumë të rinj, më shumë se 50. Tani duhet të pres shansin tim”.

KOSOVA – “Unë kur kam filluar si futbollist, ishte vetëm Kombëtarja kuqezi dhe të gjithë kishim ëndërr të luanim aty. Tani, edhe pasi është krijuar ekipi i Kosovës, ne e ndIejmë veten të atij ekipi, dhe menjëherë interesohemi si kanë dalë ndeshjet”, deklaroi Ermir Lenjani në emisionin televiziv.