Arapi i shkel syrin Teutës, pritet një sulmues uruguaian
Mbrojtësi i majtë, Renato Arapi, mund të ribashkohet me Bledi Shkëmbin te Teuta. Pasi mbylli pjesën e parë të sezonit me ekipin turk, Afjet Afionspor, durrsaku pritet të prishë kontratën. "Ka qenë zgjedhje e gabuar nga ana ime edhe e menaxherit. Jam penduar, sepse në ekip ka pasur mungesë të theksuar organizimi. Nuk e fsheh se dëshira ime është që të lëviz nga ky klub. Gjithmonë e kam pasur dëshirë për t'u kthyer në Shqipëri. Ardhja është shumë e mundur në këtë moment. Teuta? Nuk e mohoj dëshirën, pasi jam nga qyteti i Durrësit dhe nuk do të ishte keq të luaja për këtë skuadër", - deklaroi dje Arapi për "Supersport". Ndërkohë, çuditërisht edhe pse nga Durrësi, mbrojtësi nuk ka luajtur asnjëherë për Teutën, teksa karrierën e ka nisur te Besa e Kavajës. SITUATA Erlis Frashëri nuk do të jetë i vetmi afrim i Teutës. Drejtuesit po operojnë në merkato dhe në qendër të objektivave mbetet një sulmues. Prej kohësh klubi ka nisur kërkimet për partnerin ideal të Amadu Latif. Edhe pse ganezi ka bërë mjaft mirë në këto 18 javë, duke shënuar 9 gola, ofensiva shihet si një nga repartet ku ende është domosdoshmëri për përforcim. Vetëm me një sulm të frikshëm, durrsakët do të futeshin zyrtarisht në garë për titullin dhe do të sfidonin Partizanin dhe Kukësin. Ishte vetë bashkëpresidenti Ardian Bardhi që disa ditë më parë konfirmoi për gazetën se e kanë "piketuar" një lojtar dhe bëhet fjalë për një uruguaian, i cili luan në kampionatin e vendit të tij. Emri i tij mbahet ende i fshehtë, megjithatë është zbuluar vetëm që bëhet fjalë për një 25-vjeçar dhe se bisedimet janë në rrugën e duhur.