Lushnja shtrydh lojtarët, mendohet për merkaton
Verdhejeshilët do të stërviten deri në ditët e fundit
Pas dy ditëve pushim, lushnjarët kanë zbritur dje në fushën stërvitore. “Lushnja do të jetë në fushë deri ditën e shtunë, më 29 dhjetor. Janë stërvitje fakultative për të mbajtur muskulaturën në tonus”, është shprehur për “Panorama Sport” zv/trajneri Dritan Çuko. Pas barazimit në derbin me Apoloninë, lushnjarët e mbyllën pjesën e parë të sezonit në vendin e pestë, me një distancë prej tri pikësh nga vendi i gjashtë. “Me kontingjentin që kishim, themi se kemi arritur diçka. Me 12-13 lojtarë që kishim bazë, themi se kemi marrë maksimumin për pjesën e parë të sezonit, me kaq lojtarë sa kishim. Po të kishim kontingjent cilësor më tepër, themi se do të ishim nga rivalët kryesorë për të hyrë në Kategorinë Superiore”, ka nënvizuar tekniku Çuko. Te Lushnja priten disa ndërhyrje në janar për të pasur më shumë futbollistë cilësorë në përbërje dhe më shumë alternativa. “Për sa i përket janarit, do të shikojmë dhe do të bisedojmë me disa sportistë, te rolet që na kanë munguar. Po ramë dakord, do të afrohen tek ekipi i Lushnjës”, u shpreh zv/trajneri Dritan Çuko. VENDIMI Këshilli Bashkiak i Lushnjës ka miratuar me shumicë votash që kompleksi sportiv në qendër të qytetit të marrë emrin e ish-futbollistit dhe ish-trajnerit Kristaq Gogoni. Investimi i disa viteve më parë u krye në ish-stadiumin e vjetër, duke e transformuar në një kompleks sportiv. Tashmë, kjo qendër sportive do të quhet “Kristaq Gogoni”, për nder të ish-futbollistit të madh, që është edhe Qytetar Nderi i Lushnjës.