Goditje në paketë për Elbasanin, rikthehet Jaupi
Elbasani ka startuar përgatitjet ditën e djeshme pas pushimeve të shkurtra, për shkak të festave të fundvitit. Fillimisht ishte menduar që përgatitjet të nisin të hënën dhe t’i lihej edhe pak pushim skuadrës, por gjithsesi verdheblutë nuk kanë dashur të humbin kohë dhe i kanë startuar ato të premten. Në këtë seancë të parë stërvitore kanë nisur përgatitjet vetëm lojtarët elbasanas, teksa të hënën pritet të bashkohen me skuadrën edhe jabanxhinjtë, të cilëve u është lejuar pak më shumë ditë pushim për të qëndruar pranë familjeve të tyre në këtë periudhë festash. Verdheblutë pritet ta shfrytëzojnë këtë periudhë merkatoje për të bërë përforcime, në mënyrë që në fund të edicionit të arrijnë edhe qëndrimin në kategori. Mësohet se skuadra do të ndërhyjë në qendër të mbrojtjes, pasi me verdheblutë kanë dalë në stërvitje Xhulio Jaupi dhe Gledis Hida. Jaupi ka qenë edhe më parë pjesë e Elbasanit, militoi edhe në ekipe të tjera, por një dëmtim e la pak kohë jashtë futbollit. Palët janë shumë pranë marrëveshjes dhe rikthimi është gati i sigurt. Nga ana tjetër, Hida militon në radhët e skuadrës së 19-vjeçarëve të Pepas, i cili është edhe pjesë e Kombëtares së moshave. Mbetet për t’u parë nëse elbasanasit do t’i konkretizojnë këto dy objektiva në ditët në vijim, pasi ndërhyrja në merkato është kthyer në një domosdoshmëri për ekipin. Përpos repartit defensiv, në klub shpresojnë që të afrojnë të paktën edhe një mesfushor dhe një sulmues për ta kompletuar përfundimisht skuadrën për pjesën e mbetur të edicionit futbollistik.