Mavraj rikthehet në Gjermani

Kanë objektiv shpëtimin, Mërgimi: Kam përjetuar momente të tilla, por do t'ia dalim

Ka qenë një biletë vajtje-ardhje ajo që Mërgim Mavraj "preu" në fillim të sezonit për t'u larguar nga Gjermania drejt Greqisë. Sepse aventura me Arisin në Selanik zgjati shumë pak muaj dhe kapiteni i Kombëtares shqiptare është rikthyer në Gjermani për të luajtur me Ingolshtadin. Mbrojtësi kuqezi ka firmosur një kontratë deri në vitin 2020 dhe shihet nga drejtuesit e ekipit gjerman si i duhuri për të dhënë kontributin në arritjen e objektivit. Ingolshtadi gjendet në vendin e fundit të Bundesligës 2 dhe rrezikon rënien në kategorinë e tretë gjermane. Kapiteni i Kombëtares shqiptare ka firmosur një kontratë deri në vitin 2020 dhe do të udhëtojë menjëherë drejt Alikantes në Spanjë, për fazën përgatitore të ekipit. Mavraj konsiderohet si një përforcim i nevojshëm për mbijetesën dhe drejtori thotë se eksperienca e tij është e vlefshme për skuadrën. "Mërgimi sjell te ne cilësitë që na duhen për të qëndruan në ligë dhe të arrijmë objektivin sezonal. Ai është një fitues i vërtetë, e njeh futbollin gjerman dhe është një luftëtar i jashtëzakonshëm", u shpreh Harald Gartner, drejtori për Komunikimin në klub.

SFIDË- Ndërkohë, vetë Mavraj e pranon këtë sfidë të re në karrierë dhe shpreh bindjen se skuadra e tij ka gjithçka për të dalë nga kjo situatë e vështirë ku ndodhet. "Jam i bindur që do luftojmë për të dalë nga kjo situatë e vështirë. Në karrierën time kam përjetuar momente të ngjashme dhe tani dua të sjell eksperiencën time në klub", tha mbrojtësi kuqezi. Mavraj sigurisht që do të ketë më shumë hapësira dhe do të aktivizohet rregullisht në skuadrën e Ingolshtadit. Kjo gjë do ta ndihmojë edhe për eliminatoret e Europianit, ku ai është një pikë e rëndësishme për mbrojtjen dhe për trajnerin Kristian Panuçi.