Siti i Guardiolës pa mëshirë, 7 gola Roterhamit

Vazhdojnë surprizat, turpërohen "dhelprat" dhe Ranieri

Ë shtë një Mançester i papërmbajtshëm në ditën e Epifanisë. Turin e tretë të Kupës FA, "qytetarët" e shndërrojnë në festë: shënon gjysma e skuadrës në goleadën kundër Roterham Junajtid, klubit të Championship-it, që Sitin e konkurroi vetëm me ngjashmërinë e frikshme të trajnerit Pol Uarne me Pep Guardiolën. Në "Etihad Stadium" skuadra që militon në Championship, turpërohet duke iu afruar shumë poshtërimit që kishte paralajmëruar trajneri në vigjilje, duke thënë se kishte parashikuar që të përfundonte edhe 10-0. Formacioni i Guardiolës shënon "vetëm" shtatë herë. Sterling shfrytëzon brenda në zonë një pasim të bukur të De Bryjnes, driblon një mbrojtës dhe zhbllokon rezultatin në minutën e 12-të. Dy minuta nga fundi i pjesës së parë, asisti gjenial i Gyndoanit gjen Fodenin në zonë, i cili feston golin e parë me "qytetarët" në shtëpi. Por, vendësit do të rikthehen në dhomat e zhveshjes edhe me një tjetër gol, pas autogolit të Ajajit në shtesë. "Pokeri" në pjesën e dytë vjen nga këmbët e Zhezus 52', Mahrez 73', Otamendi 78' dhe Sane 85'.

REKORDI I GUARDIOLËS

Goli i shtatë i shënuar nga Leroi Sane regjistroi edhe fitoren më të thellë të Pep Guardiolës në stolin e Sitit (prej verës 2016). "Qytetarët", me katalanasin në stol, kanë fituar dy herë 6-0, kundër Uotfordit (në transfertë në shtator 2017) dhe Shahtjor Donjeckut (në shtëpi, nëntor 2018) dhe 7 gola i kishin shënuar vetëm njëherë më parë kundër Stok Sitit (në shtëpi, tetor 2017, por në fund fituan 7-2).

SURPRIZAT

Përshëndetet me kompeticionin Fulhami i Ranierit, që humbet në shtëpi 1-2 me Olldhemin (kategoria e katërt): vendimtare penalltia e humbur nga Mitroviç në minutën e 84-t. Akoma më keq "dhelprat" e Klod Puelit që humbasin 2-1 ndaj Njuportit, edhe ky formacion që militon në Ligën e Dytë. Dhe që do të ishte një ditë turpi, e paralajmëruan edhe drejtuesit e mediave të klubit, të cilët emrin austriakut Kristian Fuks ia kishin shkruar "Fucks", duke bërë xhiron e botës edhe për këtë fakt.