Partizani “peshkon” në Bjellorusi
Skënder Gega i "fiksuar" për një qendër të majtë, zbehet pista e izraelitit Idan Stein
Partizani është "fiksuar" për qendërmbrojtës. Prej kohësh kanë nisur kërkimet për një lojtar që përdor këmbën e majtë dhe pas shumë përpjekjeve duket e kanë e gjetur të duhurin. Nëse para pak kohësh ishin pranë mbylljes së marrëveshjes me izraelitin Idan Stein, situata ka ndryshuar. Trajneri Skënder Gega ka kërkuar që ta shohë 21vjeçarin në fushë dhe më pas të vendoste për të ardhmen e tij te të kuqtë. Por, menaxherët e lojtarit të Hapeol Jerusalem kanë refuzuar kategorikisht provën, çka ka bërë që kjo pistë të zbehet. Megjithatë, drejtuesit e kanë pasur gati planin rezervë, pasi prej kohësh kanë qenë duke vëzhguar një tjetër mbrojtës. Ka të njëjtat karakteristika si Stein, por 6 vite më i madh. Nga Izraeli, këtë herë kanë zhvendosur fokusin në Bjellorusi, atje ku kanë pikasur Terentij Lutsevish, 27vjeçari i lindur në Kamerun, por që disponon pasaportë bjelloruse. Palët kanë nisur bisedimet zyrtarisht dhe nga sa mëson "Panorama Sport" gjithçka është në rrugën e duhur, ndërsa parimisht kanë gjetur dakordësinë edhe për termat financiarë. Lojtari në fjalë e ka nisur karrierën si profesionit te Minsk 2 gjatë vitit 2008, kurse dy vite më pas kaloi në pronësi të Dinamos së Minskut. Edhe pse firmosi për 4 vite, ai luajti vetëm 10 ndeshje me ta dhe më pas radhazi u huazua tek ekipe si: Gomel, Vitebsk e Bereza. Mbrojtësi është aktivizuar edhe te Granit Mikashevishi, Torpedo-Belaz Zhodino apo Neftçi Fergana, ndërsa prej 2018-ës është transferuar te Smolevishit, që militon në Premier Ligën vendëse. Mbrojtësi gjigant (1.92 metra i gjatë), i cili ka luajtur edhe Kombëtaret U19 dhe U-21 të Bjellorusisë, vetëm gjatë sezonit të fundit numëron 23 ndeshje me ekipin e tij, 16 prej të cilave si titullar, çka dëshmon se është një stabël në formacion dhe me minuta në këmbë (1504 në total). Është pikërisht ky shkaku që edhe vetë trajneri i Partizanit, Skënder Gega, ka dhënë OK-in për afrimin e tij. Megjithatë, pa u arritur akordi final mes palëve, nuk ka vend për garanci.