Moti prish planet e Luftëtarit, anulohet minifaza në Greqi

Skuadra do të përgatitet në fshatin Dervician

Gentian Mezani, së bashku me ndihmësin e tij Polizoi Arbëri, mbetet i vendosur për të marrë nga të tijtë më të mirën e mundshme për pjesën e mbetur të sezonit. Me dy seanca stërvitore në ditë, dje bluzinjtë sfiduan kushtet e motit të acartë, me qëllim perfeksionimin e të tria komponentëve sportive, ato tekniko-taktike dhe fizike. Më i fundit, elementi fizik, mori kohën maksimale për trajnerin Mezani, teksa i "shtrydhi" të tijtë mes realizimeve të ushtrimeve atletike të fragmentuara rreth pistës së stadiumit "Gjirokastra". Të gatshëm nën urdhrat e "binomit" MezaniArbëri, i gjithë kontingjenti bluzi në seancën e paradites së djeshme, startuar në orën 9:30, dhe të pasdites në orën 14:30, demonstroi përkushtim dhe seriozitet në përthithjen e udhëzimeve dhe detyrave të dhëna nga stafit teknik. Lojtarë të veçantë si Erald Hyseni, Balsa Radoviç, Donald Açka paraditen e kanë ezauruar me ushtrimet në palestër për të vijuar seancën e djeshme me grupin. FAZA PËRGATITORE - Pritej që Luftëtari të udhëtonte sot drejt Greqisë, ku dhe do të kryente minifazën dimërore. Por, kushtet e motit me ngrica që ofron zona neutrale midis Athinës dhe Korinthit kanë mjaftuar që gjirokastritët nga nesër të udhëtojnë drejt fushës sportive "Lefter Millo" të Derviçianit për të vijuar ditët përgatitore mes dy fazave. Burime më shumë se të besueshme brenda kampit bluzi bëjnë të ditur se moszhvendosja e Luftëtarit drejt Greqisë së pari ka të bëjë me kushtet aktuale të motit të ftohtë dhe jo me çështjen e shumëpërfolur financiare në kampin bluzi. Ditët e mbetura deri në prag të sfidës me Egnatian, e vlefshme për ndeshjen e turit të dytë të Kupës së Shqipërisë, që do të luhet në 23 janar në fushën e rrogozhinasve, priten të shoqërohen me të tjera zhvillime në merkaton e dimrit.