Fiton Teuta, sulmi shpërthen me dopieta
Teuta e nis mbarë 2019-ën. E para miqësore e programuar për këtë vit ka sjellë shpërthimin e sulmit. Edhe pse përballë kishin ekipin U-19, duhet thënë që paraqitja e të besuarve të Bledi Shkëmbit ishte bindëse. Plot 6 gola janë dëshmia më e mirë e dëshirës që kanë durrsakët për të bërë mirë në pjesën e dytë të sezonit. Trajneri vinte në këtë takim me shumë risi, ndërsa organikës i ishin shtuar edhe të rinjtë Lushaku, Shtama, L.Beqja, Libohova dhe Jazxhi. Testi i zhvilluar në kompleksin “Olympic Park” natyrisht nuk dhuroi surpriza për sa i përket rezultatit, por ishte një ndeshje që i vjen në ndihmë stafit për të krijuar një ide të qartë për të gjithë lojtarët që ka në dispozicion. Ndeshja vendoset që në pjesën e parë me një dopietë të Uendi Vecajt dhe një tjetër dygolëshi që mban firmën e Prognit. Në pjesën e dytë ka shumë ndryshime, duke u dhënë mundësi të gjithë lojtarëve për të shfaqur më të mirën e tyre. Sërish ka një dygolësh, këtë herë për Kamaranë, i cili u fut si zëvendësues në këtë fraksion. Ekipi i të rinjve ishte shumë pranë golit në fundin e takimit, por u ndal vetëm nga shtylla, gjithsesi ishte një duel që, pavarësisht diferencave, dhuroi minuta shumë interesante. Ishte dhe ndeshja e parë për Frashërin, i cili luajti për 45 minuta pas rikthimit të tij te Teuta. Mbrojtësi korçar zyrtarisht do të mbajë fanellën me numrin 99, të cilën e mbajti në këtë takim miqësor. Lojtarët që nuk u aktivizuan në këtë takim ishin dyshja e portierëve Hidi dhe Celeski, të cilët të diferencuar kanë punuar me përgatitësin e portierëve, Rizvanin. Pjesa më e madhe e futbollistëve të rinj shfaqën dëshirën e tyre me fanellën e parë të bregdetarëve, duke lënë mënjanë emocionet dhe duke zhvilluar ndeshje të mirë përkrah lojtarëve profesionistë. Kjo ishte ndeshja e parë miqësore e kësaj faze përgatitore, por jo e fundit. Në plan janë dhe dy ndeshje, por në vazhdim do të zyrtarizohen emrat e kundërshtarëve.