Vllaznia tenton kthimin e Krujës
Lojtari: Ende nuk kam vendosur për të ardhmen, të kthehesh në shtëpi s’është gabim
Vllaznia ka nisur të mendojë seriozisht për merkaton e janarit. Drejtori teknik, Engin Firat, në një reagim të tij një ditë më parë bëri të ditur se Renato Malota nuk do të largohej. Gjithashtu, trajneri Hasan Lika deklaroi se asnjë futbollist që është nën kontratë me skuadrën shkodrane, nuk do të ikë. Duket se drejtuesit janë të bindur që të mos lëshojnë asnjë prej titullarëve të pjesës së parë të kampionatit. Ndërsa, janë përqendruar tek afrimet që mund të bëjnë për ta forcuar skuadrën edhe më shumë në pjesën e dytë të garës.
KRUJA - Emri i parë që del në skenë si më i mundshmi për të veshur fanellën e Vllaznisë në vazhdim është ai i Arsid Krujës. 25-vjeçarit i ka përfunduar kontrata që kishte me Teutën dhe tani është lojtar i lirë. Futbollisti do të kërkojë të luajë sërish në Superiore, por një opsion është edhe Vllaznia. Një kthim i tij në skuadrën e vendlindjes do të ishte i rëndësishëm për kuqeblutë. Në një reagim për televizionin lokal TV1 Channel, Kruja ka deklaruar: “Është e vërtetë që kam pasur një bisedë me drejtuesit e Vllaznisë, por fillimisht duhet arritur akordi që të luaj me këtë skuadër. Si shkodran që jam, shpresoj të jap kontributin tim sepse të kthehesh në shtëpi, nuk është asnjëherë gabim. Megjithatë, do të presim në ditët në vazhdim për të parë se çfarë do të ndodhë”. Më pas, mesfushori me tipare sulmuese ka sqaruar edhe arsyet e largimit nga Teuta. “Me skuadrën durrsake përfundova kontratën 1-vjeçare që kisha dhe tashmë do të gjej një ekip tjetër për të vazhduar karrierën. Do të mundohem të gjej një ekip që të kem më shumë minuta në dispozicion”, deklaroi ndër të tjera Kruja në prononcimin e tij.
FAZA PËRGATITORE Periudha e ndërprerjes së kampionatit në janar u shërben të gjitha skuadrave për të zhvilluar një stërvitje intensive në mënyrë që futbollistët të marrin ngarkesën e duhur. Mësohet se drejtuesit kanë diskutuar mundësinë për të zhvilluar një stërvitje disaditore diku jashtë vendit, por në fund është marrë një vendim tjetër për të qëndruar në Shkodër. “Për sa i përket stërvitjes, jemi në Shkodër, duke e ndërthurur me ndonjë ndeshje miqësore me ekipe të Superiores”, tha trajneri Lika.