Epoka e lavdishme e Zidanit nisi dhe mbaroi në janar...
Janari është muaji që ka shënjuar historinë e Realit të Madridit në vitet e fundit. Përpara 3 vitesh, Zinedin Zidan u prezantua në “Bernabeu” si trajneri i ri dhe nisi një epokë të artë dhe të lavdishme duke fituar 9 tituj nga 13 të mundshëm, mes tyre 3 Champions radhazi. Por, kjo epokë përfundoi verën e kaluar, kur francezi mori vendimin për t’u larguar. Vendim që e kishte nisur ta mendonte që në janarin e vitit të kaluar. Ishte 4 janari i vitit 2016, kur Florentino Perez shkarkoi Rafa Benitezin pas humbjes 0-4 ndaj Barcelonës në “Bernabeu” ku tifozët nisën koret kundër presidentit: Florentino largohu! Ai në fakt largoi trajnerin dhe vendosi t’ia besonte skuadrën trajnerit të Kastijës. Francezi e mori drejtimin e ekipit në kushte të vështira, skuadër e çorganizuar, e pamotivuar, 5 pikë larg Barcelonës dhe 4 nga Atletiko, e eliminuar nga Kupa për shkak të aktivizimit të Çerishevit. Pak nga pak filloi të merrte në dorë frenat e skuadrës dhe këtë e bëri falë vendimeve jo të lehta. Vendosi të ulte në stol Hames Rodrigezin, i cili ishte blerje milionere e presidentit Perez, të bindte Kristianon që të pranonte stolin dhe të aktivizonte më shumë Kasemiron. Në dy sezone e gjysmë me francezin në stol, Reali fitoi 9 tituj nga 13 të mundshëm: 3 Champions, një kampionat, dy Botërorë klubesh, dy Superkupa Europe dhe një Superkupë të Spanjës. U bë trajneri i dytë me më shumë trofe në historinë e Realit të Madridit, duke u parakaluar vetëm nga Migel Munjoz (14 trofe).
LARGIMI- Në 31 maj të vitit 2018, Zidan i surprizoi të gjithë pasi mori vendimin për të dhënë dorëheqjen, pavarësisht se kishte edhe 2 vite kontratë dhe pavarësisht se fitoi 3 Champions radhazi. Ky vendim erdhi pas një sezoni jo shumë të mirë dhe me uljengritje. Trajneri Zidan e mendoi largimin që në janar. Në 6 janar pati një përplasje mes tij dhe presidentit Perez, për shkak të strategjisë të së ardhmes. Perez ishte gati të paguante 20 milionë euro për portierin Kepa Arrizabalaga, ndërsa Zidan tha se nuk kishte nevojë për një portier. Ai kërkoi respekt për portierin e tij Kejlor Navas dhe 16 ditë më vonë Kepa rinovoi me Atletikon e Bilbaos duke pasur klauzolë 80 milionë euro. Eliminimi nga Kupa e Mbretit ishte fatal dhe ai mendoi se ishte koha që ta linte skuadrën, por i shkoi deri në fund dhe fitoi Championsin. Kështu u mbyll një epokë e lavdishme, e cila nisi dhe përfundoi në janar...