Bizhdili urdhëron: Dua Superioren, Besa ime meriton 8
“Kushtet perfekte, presim edhe dy afrime cilësore”
Presidenti i Besës, Nexhat Bizhdili, duket më entuziast se kurrë se skuadra e këtij sezoni do të rikthehet pas 5 vitesh mungesë në Superiore. Bizhdili e bazon këtë bindje në grupin që ka, merkaton dhe stafin me përvojë me në krye trajnerin Gugash Magani. Krahas dy afrimeve, të Ejoh dhe Mziut, verdhezinjtë presin edhe 2 futbollistë brenda ditës së mërkurë. Në një intervistë për gazetën “Panorama Sport”, Bizhdili i bën skanerin pjesës së parë të kampionatit dhe i vendos skuadrës notën tetë. “Që një ekip të ketë sukses, duhen disa elementë. Besa e ka grupin, ka staf me përvojë dhe ka pagesa korrekte si askush. Dhe e fundit, më gjeni një ekip qoftë të Superiores që futbollistët janë akomoduar në një resort turistik, sikur të ishin turistë e jo futbollistë. Për të gjitha këto u thashë lojtarëve e stafit se pres vetëm Superioren”, thotë ndër të tjera Bizhdili në intervistën e tij për gazetën.
Sa i kënaqur jeni nga ajo çfarë Besa prodhoi në 2018-ën?
Nisur nga përbërja me lojtarë mjaft të rinj, jam shumë i kënaqur. Nëse do më pyesni t’i vendos notë skuadrës nga 1 te 10, do t’i vendosja një tetë. Kjo pasi në 4 javët e fundit, gabuam duke barazuar në shtëpi 2 ndeshje dhe humbur në Fier. Këto rezultate sollën rokadën ku ia lëshuam vendin e parë Bylisit, për më keq tashmë me 4 pikë diferencë. Kjo solli edhe largimin e Gentjan Begesë, të cilin e falënderoj për kontributin që dha dhe afrimin e një trajneri me përvojë
si Magani.
Sipas jush, 4 pikë diferencë me Bylisin nuk janë shumë për t’u rikuperuar?
Jo, nuk janë asgjë. Ju e dini se në fazën e tretë pikët përgjysmohen, çfarë e bën këtë diferencë në 2 pikë. Pra, ne do ta mundim Bylisin dhe ja ku i kaluam në renditje. Janë edhe 4 javë për t’u luajtur në fazën e dytë dhe pastaj tetë të tilla në fazën e tretë. Pra, pikë ka shumë në lojë dhe ajo që ne do bëjmë, do të jenë fitoret dhe sakrifica në çdo takim.
Harruat që Besa ka në gjirin
e saj mbi 50 për qind të formacionit 18-20 vjeçarë pa përvojë?
Kjo është e vërtetë, sa ç’është e vërtetë edhe qenia në ekip e lojtarëve me përvojë si Miraka, Çekiçi, Mihani, Dikson, Onuh, Çelhaka, Biba, Kullolli dhe të tjerë. Janë gërshetuar talenti dhe rinia me përvojën. Besoj se vendi i dytë e dëshmon këtë, ndryshe me të rinj siç thoni ju nuk do të ishim këtu ku jemi. Pavarësisht kësaj, ne tani në janar afruam dy lojtarë cilësorë dhe përvoje si Ejoh e Mëziun. Jemi në bisedime me
disa futbollistë të tjerë cilësorë. Grupi do të plotësohet në atë formë sa të garantojë kthimin në Superiore.
Para lojtarëve u duk sikur dhatë “urdhër” se doni patjetër Superioren. Çfarë mesazhi dëshironit të përcillnit në seancën e parë për këtë vit?
Dëgjoni. Që një ekip të ketë sukses, duhen disa elementë. Besa e ka grupin, ka staf me përvojë dhe ka pagesa korrekte si askush. Dhe e fundit, më gjeni një ekip qoftë të Superiores që futbollistët janë akomoduar në një resort turistik, sikur të ishin
turistë e jo futbollistë. Për të gjitha këto u thashë lojtarëve e stafit se pres vetëm Superioren. Nëse ju gjykoni se ishte urdhër, nuk do ishte keq (qesh).
Rivali që i frikësoheni më shumë?
Asnjë. Të gjitha janë skuadra të forta dhe me objektiva për t’u ngjitur, si Bylis, Egnatia apo ekipe të tjera. Besoj se do të jetë një garë shumë e fortë deri në fund, por ne nuk i frikësohemi asnjë ekipi. Do të bëjmë gjithçka në fushë për të zënë vendin e parë dhe për ta rikthyer ekipin në elitë.