Vjen Xhekson, bluzinjtë presin Vucajn
Gjirokastritët nën drejtimin e dyshes Mezani-Arbri vijojnë përgatitjet dimërore. Pas seancës stërvitore të ditës së djeshme, lidhur me gjendjen fizike të lojtarëve dhe programin e së ardhmes për "Panorama Sport", trajneri i Luftëtarit, Gentian Mezani, u shpreh: "Ditët e para të përgatitjeve i nisëm me dy seanca stërvitore në ditë dhe sot zhvilluam një seancë në "Fushën e Vjetër" me qëllim të vetëm, perfeksionimin e treguesve negativë në dy fazat e mbetura. Aktualisht, të gjithë lojtarët gëzojnë formë të mirë fizike dhe përditë e më shumë tregojnë devotshmëri dhe përkushtim për të asimiluar deri në detaje programin ditor. Për të parë më afër kondicionin aktual të lojtarëve dhe promovimin, pse jo dhe më të rinjve, sot kemi planifikuar ndeshje miqësore me Butrintin, që do të luhet në Sarandë".
Luftëtarit i është bashkuar dje edhe mbrojtësi i linjës së majtë, braziliani Xhekson. Mosudhëtimi i Luftëtarit drejt Greqisë për kushtet e motit të ftohtë mjaftoi që braziliani të lërë tokën helene për t'ju bashkëngjitur Luftëtarit. Sakaq, burime konfidenciale në klub bëjnë me dije për "Panorama Sport" se Luftëtari është në pritje të mesfushorit shkodran, Erjon Vucaj, pasi, nga sa mësohet, lojtari po negocion prishjen e marrëveshjes me skuadrën kosovare, Drita e Gjilanit. Vucaj veshi fanellën bluzi në dy ballafaqimet e gjirokastritëve në Kupat e Europës ndaj skuadrës Ventspils të Letonisë. Largimi i fantazistit Eduart Rroca te Kukësi duket se ka lënë "gropën" bosh në zemër të mesfushës e kësisoj Vucaj do të kompensonte më së miri numrin 10 të bluzinjve, Rrocën. Shpatullat e brishta të 19-vjeçarit beratas, Erald Hyseni, s'do të mjaftonin për të mbajtur mbi supe rolin e "regjisorit" në gjysmën e sezonit të mbetur, ndaj bashkimi i Vucaj me skuadrën bluzi do të mbushte më së miri vendin vakant të lushnjarit Eduart Rroca.