Noka: Forcohemi në merkato dhe “kërcënojmë” Vllazninë
Besëlidhja/ Presidenti beson te kreu: Do jetë viti ynë
Gjok Noka paralajmëron ringritjen e Besëlidhjes. Edhe pse pjesa e parë e sezonit pati luhatje të mëdha, presidenti është i bindur që me pak afrime, skuadra do të kthehet në një “kërcënim” serioz për Vllazninë&Co. Gjatë deklaratës së dhënë për “Panorama Sport”, numri një i klubit ndalet gjerësisht edhe te gabimet e bëra në 14 javët e para, por beson se nga janari e tutje, lezhjanët do të jenë befasia e Kategorisë së Parë. “Duke parë pozicionin në të cilin ne mbyllëm gjysmën e parë të sezonit dhe rezultatet, mund të them që janë të papranueshme.
Kemi grup realisht cilësor, ndaj prisja shumë më shumë. Megjithatë, 2019-ta do të jetë shumë më ndryshe. Unë kam besim te ky kontingjent, pasi në ndeshjet decizive që konsideroheshin të vështira ia dolëm që të grumbullonim pikët e mundshme. Duhet të korrigjojmë
pak me përballjet që në letër janë lehtësisht të kalueshme, pasi kemi çeduar. Këtu u ndalëm gjerësisht edhe në analizën përmbyllëse që zhvilluam gjatë të gjysmës së parë të sezonit. Duke lënë pas atë çka ka kaluar, tani po mendojmë për të ardhmen dhe për këtë po punojmë intensivisht”, tha fillimisht Noka. Revolucion në ekip nuk do të ketë, ndërsa presidenti qartëson se edhe afrimet do të jenë me pikatore. Ai këtë herë mendon më shumë që t’i shtojë cilësi ekipit. “Tani është edhe fushatë merkatoje, ku mendojmë që të afrojmë cilësi dhe jo sasi. Do të ndërhymë aty ku ka me të vërtetë kemi mungesa apo dobësi. Në ditët në vijim do të dalim me emra konkretë që pritet t’i bashkohen skuadrës në stërvitje nën urdhrat e Vladimir Gjonit. Jemi duke biseduar dhe shumë shpjet do të mbyllen edhe marrëveshjet. Ndonëse gjysmën e parë të sezonit e mbyllëm në vendin e pestë, Besëlidhja do të mbetet kërcënimi kryesorë për kreun. Vllaznia, Erzeni, Dinamo apo edhe Korabi që janë mbi ne në tabelë nuk do të kenë qetësi. Gjatë minifazës së janarit, skuadra do të stërvitet intensivisht dhe nuk do të mungojnë ndeshjet miqësore. Një gjë është e sigurt, se standardet paralele që u vërejtën gjatë periudhës që përfundoi, në gjysmës së dytë të sezonit nuk do të ekzistojnë”, kështu e mbylli prononcimin e tij presidenti i Besëlidhjes.