Durmishaj, gol në acar... Lilës
I realizon PAS Janinës me penallti, ndeshja nis me vonesë prej dëborës dhe ngricave
Moti i acartë nuk ka përfshirë vetëm territorin e Republikës së Shqipërisë, por të gjithë Europën. Për pasojë, edhe Greqia është përfshirë së fundmi nga moti me temperatura të ulëta dhe reshje dëbore. Pikërisht, ngricat dhe dëbora kanë bërë që takimi i djeshëm në Kupën e Greqisë mes PAS Janinës dhe Panioniosit të nisë me 15 minuta vonesë. Mirëpo, as moti dhe acari apo as Andi Lila me shokë nuk e kanë ndalur dot formën që po kalon sulmuesi kuqezi. KUPA
Për Durmishajn, PAS Janina është bërë "preja" e preferuar. Dje, sulmuesi kuqezi ka shënuar në ndeshjen e vlefshme për Kupën e Greqisë që përfundoi në barazim 1-1. Sulmuesi kuqezi është abonuar me golin në futbollin grek. Në minutën e 24-t, 22-vjeçari u tregua i saktë nga pika e bardhë e penalltisë duke vendosur baraspeshën, teksa vendësit kishin shënuar të parët në minutën e 13-të me anë të Krizman. Në këtë
përballje, titullar luajti edhe Andi Lila me PAS Janinën, duke bërë që në fushën e lojës të ketë një derbi kuqezi. Ky ishte goli i dytë radhazi për Durmishajn në portën e PAS Janinës, pasi shqiptari gjeti rrugën e rrjetës edhe në sfidën e kampionatit që u fitua nga skuadra e Andi Lilës me rezultatin 3-1. FORMA
Bomberi kuqezi është duke udhëhequr skuadrën e tij në të dy kompeticionet, kampionatin grek, por edhe në Kupën e Greqisë. Në 4 ndeshjet e fundit, sulmuesi i Kombëtares Shpresa që në grumbullimin e fundit mori ftesë nga trajneri Panuçi në Kombëtaren A, ka arritur të realizojë 3 gola duke u shndërruar në një bomber te skuadra e Panioniosit. Për të, në Greqi raportohet se ka një akord që të transferohet tek Olimpiakosi në fund të sezonit, por nuk kanë munguar edhe interesimet jashtë Greqisë për shërbimet e tij.