Efenberg: Bajerni po fshihet, gjoba e Riberisë qesharake
"Gjoba duhej të ishte me 6 shifra, por s’kanë guxim"
Në çështjen e Frenk Riberisë, ishkapiteni i Bajernit të Mynihut, Stefan Efenberg, akuzon klubin për mungesë transparence. Riberi iu përgjigj me fyerje të papranueshme fjalëve të rënda që iu drejtuan nga ndjekësit në "Instagram", postimit të tij teksa hante një biftek të veshur me ar në një nga restorantet "Salt Bae" të shefit të njohur të kuzhinës turke, Nusret Gëkçe. Bajerni e gjobiti për fjalorin e tij, por ish-mesfushori i kampionëve të Gjermanisë priste që klubi ta bënte publike shifrën e gjobës dhe shpresonte që ajo të ishte një shumë me gjashtë shifra. Në komentin e tij për portalin "tonline.de", Efenberg shkruan: "Masa e gjobës duhet të ketë qenë me të vërtetë e ulët. Problemi është se askush nuk tregoi se sa është vlera e vërtetë e gjobës dhe se ku do shkojnë ato para. Do të shkojnë në arkat e Bajernit, apo do të jepen për bamirësi? Transparenca do ishte gjëja më e rëndësishme këtu". Mbron francezin
"Tigri" e argumenton faktin se këmbëngul që gjoba ka qenë e ulët për 35-vjeçarin, për shkak të formës që francezi ka treguar këtë sezon: "Nëse Riberi do të kishte luajtur një fazë të parë të dobët, do të kishte dështuar shpesh apo do të kishte qenë i pakënaqur, atëherë edhe vendimi mund të kishte qenë i ndryshëm. Por në këtë mënyrë, ekzistonte rreziku që futbollisti të mos luante mirë në fazën e dytë". Gjithsesi, si një futbollist rebel, Efenberg e merr në mbrojtje lojtarin gjaknxehtë nga ata që kërkojnë kokën e tij: "Kush kërkon tani pezullimin apo përjashtimin e tij, nuk ka luajtur kurrë futboll profesionist". Ditën e djeshme Nusret Gëkçe ka provokuar me një postim në "Instagram", duke shfaqur një biftek të veshur me ar, si ai që i shërbeu Riberisë pak ditë më parë. Nuk mungoi as reagimi ironik i futbollistit në komente, me disa emoji që qeshnin.