Valverde kapet me mbrojtjen: Po pësojmë më shumë se duhet

Sot Levante-Barcelona, trajneri i tregon derën Munirit

Ernesto Valverde kërkon kujdes nga skuadra e tij në ndeshjen e “Kupës së Mbretit” kundër Levantes sepse golat e pësuar në këto sfida janë vendimtare në përcaktimin e kualifikimit. Katalanasit do të luajnë mbrëmjen e sotme në (21:30) në transfertë dhe trajneri thotë se skuadra e tij duhet të jetë e vëmendshme në mbrojtje.

SHUMË GOLA- “Jemi ekip që shënojmë shumë gola, por edhe kemi pësuar. Në Kupë duhet të bëjmë kujdes, sepse golat janë vendimtarë për fatin e kualifikimit. Levante ka shumë arsye për të besuar, por ne duam të kalojmë. Do të bëj rrotacione sepse kemi shumë ndeshje”.

MUNIR- “Nuk flas kurrë për agjentët e lojtarëve. Unë flas me lojtarët. Munir ka marrë një vendim për të ardhmen dhe klubi gjithashtu. Duam një zgjidhje sa më të shpejtë për rastin e tij. Nëse është në këtë merkato, më mirë”.

SUAREZ- “Kemi shumë lojtarë të rinj nga akademia që mund ta zëvendësojnë. Por, do të shohim çfarë mund të bëjmë edhe në merkato. Ekziston një mundësi që të afrojmë një lojtar”.

RROTACIONE- “Sigurisht që do të bëj ndryshime. Lojtarët që u aktivizuan me Getafen janë rikuperuar, por nuk do të luajnë të gjithë kaq shumë.

VAR- “Ishte e shkruar që të ndodhte kështu. Polemikat në futboll nuk do të përfundojnë kurrë. VAR-i e bën futbollin më të drejtë në princip, por askush nuk është i kënaqur me asgjë”.

STRATEGJIA- “Nuk mendoj se humbëm në Romë, sepse i dhamë shumë rëndësi Champions-it. Por, është e vërtetë që në këtë muaj kemi ndeshje intensive dhe duhet t’i ndryshojmë gjërat”.