Kutinjo bëhet çështje, Nejmar telefonon Barçën
Agjentët telefonojnë klubin për të kërkuar informacione, me Levanten zhgënjeu
Pavarësisht se në Bar celonë janë mundu ar ta fshehin dhe ta trajtojnë me kujdes, tani gjithçka është e qartë: Po, ka një çështje "Kutinjo". Dhe kjo u bë e ditur nga ndihmësi i Ernesto Valverdes, Xhon Aspiazu. Në një intervistë përpara ndeshjes së "Kupës së Mbretit" ndaj Levantes, ai tha se Kutinjo nuk ishte në nivelin e një viti më parë dhe kishte humbur terren në krahasim me Dembelenë. "Kutinjo më duket se nuk është në nivelin e vitit të kaluar. Dembele i ka dalë përpara në hierarkinë e sulmit", ka thënë Aspiazu. U duk një deklaratë e nxituar dhe e tepërt, por ndeshja i dha të drejtë ndihmësit të Valverdes. Kutinjo, i cili kishte munguar për një kohë të gjatë në fushat e lojës, humbi 17 topa dhe vetëm në fundin e saj arriti që të shfaqte disa shkëndija. Në fund shënoi një penallti, e cila i jep shpresë Barcelonës për ndeshjen e kthimit. Por, e imagjinoni dot se çfarë mund të ndodhte nëse e humbte atë? Ernesto Valverde u tregua gjithashtu i drejtpërdrejtë: Nëse një lojtar nuk është i lumtur, duhet të luftojë në fushën e lojës për ta ndryshuar situatën.
AGJENTËT - "La Cope" informon se agjentët e lojtarit (Kia Jorabçian dhe Xhuliano Bertoluçi) kanë kontaktuar në zyrat e klubit për të kuptuar se çfarë po ndodh dhe për të shprehur pakënaqësinë e Kutinjos. Ata gjithashtu kanë bërë me dije se në kampin katalanas ka drejtues që nuk e kuptojnë sesi po e menaxhon Valverde futbollistin brazilian. Duket se gjithçka ka ndodhur në momentin kur Kutinjo e humbi fanellën e titullarit, por menaxherët mendojnë se atij nuk i është dhënë shansi për të luajtur sa duhet pas dëmtimit. Në fakt, prezenca e Vidalit në mesfushë ka bërë që Valverde të preferojë më shumë Dembelenë në sulm. Kutinjo e ka humbur protagonizmin dhe ndaj Getafes luajti vetëm 8 minuta, shifra më e ulët që nga koha kur nisi kampionati. Por, shifrat e brazilianit ishin alarmante në Valencia kundër Levantes, në sfidën e vlefshme për "Kupën e Mbretit".