Kamza largon Roloviç, firmos portieri Selaci
Sulmuesi malazez rezultoi i tepërt në ekip
Vetëm dy gola në pjesën e parë të sezonit dhe një performancë deri diku të kënaqshme nuk mjaftuan që Ognjen Roloviç të vazhdonte kontratën me Kamzën. Mbipopullimi i repartit ofensiv i impononte natyrshëm klubit kamzali skarcime. Ardhja e meksikanit Izazola bëri që numri i të huajve të rritet ndjeshëm dhe në këtë mes e pësoi malazezi Roloviç. “Klubi bën të ditur ndërprerjen e bashkëpunimit me sulmuesin Ognjen Roloviç. I urojmë suksese lojtarit në vazhdimin e karrierës së tij, duke e falënderuar për kontributin e dhënë me ngjyrat tona”, shkruhej dje në faqen zyrtare të klubit të Kamzës. Ndërkohë, po gjatë së premtes, Kamza zyrtarizoi edhe afrimin e portierit Elidon Selaci, i cili firmosi kontratë 1-vjeçare me klubin. Në fakt, për Selacin ky është një rikthim, sepse ka qenë pjesë e Kamzës edhe në sezonin 2011-2012. Në pjesën e parë të këtij sezoni portieri nga FushëKruja është aktivizuar me Burrelin në Kategorinë e Parë. Ndërkohë, duhet thënë se afrimi i një tjetër portieri, duke iu shtuar këtu Avdylit dhe bullgarit Mario Kirev, me siguri do të bëjë që ky i fundit të largohet nga Kamza. Megjithatë, ende nuk ka diçka zyrtare për bullgarin.
STËRVITJE NË DURRËS
Dështon minifaza në Itali, Kamza detyrohet të udhëtojë drejt Durrësit për t’u grumbulluar aty dhe vazhduar përgatitjet në kompleksin “Olimpik Park” në qytetin bregdetar. Pas seancës së
djeshme, skuadra e Ernest Gjokës është spostuar në Durrës, teksa të gatshëm janë 25 lojtarë. Javën e ardhshme janë planifikuar dy miqësore, e para do të zhvillohet të mërkurën kundër Kastriotit në aneksin e stadiumit “Niko Dovana”, ndërsa tjetra të shtunën (kundërshtari nuk është gjetur). Ndërkohë, ishte parashikuar që minifaza e Kamzës të bëhej në Leçe të Italisë, por burime të gazetës në klub tregojnë se kostoja e madhe financiare stepi drejtuesit për të zhvendosur ekipin në Itali. Nga drejtuesit pak ditë më parë u paralajmërua se ishin gati miqësore me ekipe të njohura italiane, por ky plan dështoi. Aktualisht, drejtuesit po punojnë për të forcuar skuadrën në merkato, teksa emergjent shihet afrimi i qendërmbrojtësve. Sytë e klubit janë hedhur në tregun kosovar.