Kukësi bind ndaj rusëve, ndryshon skema
Nga 3-4-3 varianti bëhet 4-2-3-1, Rexhinaldo ulet në stol
Kukësi barazon 1-1 ndaj klubit gji gand rus, Rostov, teksa autori i golit është sërish Arbër Çyrbja, i cili arriti të shënonte edhe në miqësoren e parë kundër Istanbul Basaksehir. Të besuarit e Armando Cungut zhvilluan një lojë të mirë ndaj një kundërshtari me nivel të lartë. Sa u përket golave çdo gjë është mbyllur që në pjesën e parë, ku të dyja skuadrat ishin në fushë me formacionet më të mira. Risi te Kukësi ishte ndryshimi i skemës dhe aktivizimi nga minuta e parë i dy blerjeve të janarit: Eduard Rroca dhe Vasil Shkurtaj. Nga skema e preferuar 3-4-3 e muajve të fundit, trajneri Cungu provoi dje variantin taktik 4-2-3-1, që në varësi të lojës bëhej edhe 45-1 ose 4-4-1-1. Vasil Shkurtaj ishte në majën e sulmit, ndërsa Çyrbja dhe Melo e mbështesnin nga krahët. Më afër sulmuesit qëndronte Rroca në rolin e një fantazisti, ndërsa nga stoli e nisi Rexhinaldo.
NDESHJA
Nënkampionët në fuqi të Shqipërisë e panë vetën në disavantazh që në minutën e 17-të, kur Gulevski shënoi për rusët. Por, pa përfunduar pjesa e parë, mesfushori i avancuar i krahut të djathtë, Arbër Cyrbja shtang Rostovin, duke realizuar një gol mjaft të bukur pas goditjes në afërsi të zonës. Në pjesën e dytë, skuadrat thuajse ndryshuan totalisht, por përtej rasteve të shumta që patën, rezultati nuk ndryshoi. Krasniqi, Qaqi, Ethemi, Rexhinaldo dhe Kalaja u futën njëri pas tjetrit nga trajneri Cungu. Portieri Faton Maloku ishte i vetmi futbollist me probleme fizike që nuk ishte grumbulluar dje. Ndërkohë, vlen të theksohet se fanellat e Rrocës dhe Shkurtajt ishin ato që kanë mbajtur Musolli dhe Shkodra. Një gafë në organizimin e klubit, për më tepër që bëhet fjalë për miqësore ndërkombëtare, ku gjithçka nis nga detajet e vogla, por, me sa duket, te Kukësi kanë bërë llogari gabim me fanellat. Rroca kishte numrin 23 dhe mbi shpinë shkruhej Musolli, ndërsa Shkurtaj mbajti numrin 10 dhe me fanellën ku shkruhej Shkodra.