Tahiraj te Hajduku, një vlonjat bën lëmsh Kroacinë
22-vjeçari shqiptar ishte pranë nënshkrimit me Dinamo Zagreb
Françesko Tahiraj bën "lëmsh" Kroacinë. Deri dje në mbrëmje në të gjitha mediat kroate, por jo vetëm, flitej për një akord mes sulmuesit të talentuar vlonjat dhe klubit të Dinamos së Zagrebit. Mirëpo, pas një historie si telenovelë, të premten në 23:30 gazeta e njohur kroate "Jutarnji", zbulonte se Tahiraj i është bashkuar Hajdukut të Splitit në Belek të Turqisë, aty ku ekipi po kryen fazën përgatitore. 22-vjeçari shqiptar, i cili ka shkëlqyer në fazën e parë në kampionatin slloven, duke realizuar 9 gola dhe ofruar 4 asiste, për ngjyrat e Aliminij, ekip ku luan që prej vitit 2016, pritet që të bëjë hapin e madh të karrierës në këtë merkato dimërore. Sulmuesi anësor është në skadencë kontrate me klubin e tij aktual dhe pas një takimi që ka pasur javën e kaluar me drejtuesit e klubit kroat, palët kanë rënë dakortd për të nënshkruar një marrëveshje 3-vjeçare, e cila pritet që të zyrtarizohet në ditët në vazhdim. Pa dyshim që nëse gjithçka do të zyrtarizohet, përjashtuar ndonjë surprizë të mundshme, duke qenë se për atë ka qenë i interesuar edhe Dinamo Zagreb, Françesko Tahiraj do të ketë shansin që të bëhet pjesë e një prej klubeve të mëdha të Ballkanit dhe nga sezoni i ardhshëm mund të luajë edhe në Kupat e Europës.
NGA JUVJA TE HAJDUK
Françesko Tahiraj është një lojtar që ka fituar jo pak herë vëmendjen e mediave, duke nisur fillimisht nga ato italiane, meqenëse ai ka hedhur hapat e parë të rëndësishëm në vitin 2013, në radhët e të rinjve të Juventusit, ku u prit me shumë elozhe. Më pas, ai kaloi në skuadrat e Karpit dhe të Torinos, për t'u transferuar përfundimisht në Slloveni, në vitin 2016 te skuadra e Zavrcit, ku nisi edhe karrierën si profesionit. Një sezon më pas, ai kaloi tek Alumnij, aktualisht skuadër që renditet e treta në kampionatin vendës, ku në dy sezone e gjysmë ka grumbulluar 83 prezenca dhe ka shënuar 18 gola, ndonëse ky aktuali është sezoni i tij më pozitiv. Sigurisht që me kalimin te Dinamo e Zagrebit, Françesko Tahiraj do të ketë një vëmendje shumë më të madhe edhe nga trajneri i Kombëtares shqiptare, Kristian Panuçi, për një grumbullim të mundshëm për ndeshjet e radhës.