Fusha stërvitore jashtë funksionit, Lushnja sot në Ulqin
Lushnja e pjesës së dytë të edicionit pritet të jetë po ajo që mbylli gjysmën e parë të tij. Pa as edhe një ndryshim. Në këto ditë të janarit është e njëjta skuadër. Asnjë largim dhe asnjë afrim. Por, në stadiumin “Roza Haxhiu” bie në sy prania e sulmuesit të njohur Brunild Pepa, i cili edhe dje është stërvitur me skuadrën verdhejeshile. Sulmuesi 28-vjeçar ka shkëputur marrëdhëniet me Gjilanin dhe është në kërkim të një skuadre të re. “Ishte një eksperiencë. Kishte futbollistë të mirë. Nuk është se ishte në nivelin e kampionatit shqiptar. Por, që po investohet shumë në këtë drejtim për t’u ngritur në nivel. Po afrohen dhe lojtarë shqiptarë. Por, që mungojnë shumë terrenet. Infrastruktura nuk është shumë e mirë. Por, që janë njerëz që e duan shumë futbollin. Si në çdo lloj vendi nëse gjërat nuk shkojnë mirë për të dyja palët, vjen një përfundim. Nuk është hera e parë për mua. Do të shikoj përpara tani”, është shprehur sulmuesi Pepa. Sulmuesi 28vjeçar nuk përjashtoi dhe alternativa të tjera në Kosovë. PËRGATITJET - Bashkia e Lushnjës e ka shtyrë me 24 orë nisjen e skuadrës drejt Ulqinit për një minifazë përgatitore. Skuadra e drejtuar nga Ilir Gjyla është stërvitur dje në orën 13:30, në stadiumin “Roza Haxhiu”. Vrapime anës fushës dhe ushtrime në pistën e impiantit lushnjar. Aneksi stërvitor, siç duket edhe në foto, është tërësisht jashtë funksionit dhe duket se mundësia për rikonstruksionin e një fushe stërvitore po zgjatet pafundësisht te Lushnja. Mungesa e një terreni stërvitor po e detyron skuadrën që të udhëtojë për fazë përgatitore deri në Ulqin. Sot, në orën 13:00 pritet që verdhejeshilët të udhëtojnë drejt Ulqinit për t’i vijuar përgatitjet në kushte grumbullimi. Rikuperimi i Taullaut dhe Xhafës po shkon mirë, pasi ata i janë bashkuar skuadrës.