Hasani, drejt Besëlidhjes: Kthehem për një... “Miss”

Të detyruar nga të ftohtit dhe reshjet e ditëve të fundit, Besëlidhja këtë javë stërvitore po e mbyll duke u stërvitur në kalçeto. Ndonëse nuk ka ndonjë zyrtarizim në kuadër të merkatos së janarit, kontaktet me futbollistë janë të shumta, ku disa prej tyre janë në bisedime. Njëri është sulmuesi kurbinas Saimir Hasani, i cili momentalisht luan në Kosovë me FC Vitia. SULMUESI Këtë e konfirmoi vetë lojtari në një prononcim enkas për gazetën “Panorama Sport”, duke u shprehur: “Pas një karriere në Shqipëri te disa skuadra përfshirë edhe Shkumbinin, tani luaj në kampionatin kosovar, konkretisht me FC Vitia si sulmues. Këto ditë jam kontaktuar nga drejtuesit e Besëlidhjes dhe jam në bisedime, nga të cilët pres ofertën financiare për të mbyllur akordin nëse biem dakord. Besëlidhja është një skuadër që ia vlen ta veshësh atë fanellë historike, ndonëse sot militon në nivelin inferior, por që shumë shpejt jam i bindur se do të rikthehet atje ku e ka vendin e saj. Besoj se oferta do të jetë e kënaqshme për të dyja palët, çka do të bëjë që unë gjysmën e dytë të sezonit të vishem me ngjyrat e Besëlidhjes. Ndonëse jam nën kontratë në Kosovë te Vitia, nëse biem dakord me presidentin e Besëlidhjes, më mundësohet lehtësisht largimi nga andej pavarësisht se më duan shumë”, u shpreh fillimisht Hasani në prononcimin e tij për gazetën. Më tej, ai rendit edhe një prej faktorëve shumë të rëndësishëm përse dëshiron rikthimin në Shqipëri. “Shumë faktorë më tërheqin në kampionatin shqiptar, por motivi kryesor për rikthimin në Shqipëri është se më josh ‘Miss Pavarësia’. Pjesën dërrmuese të golave ia kam dedikuar asaj dhe këtë e kam deklaruar edhe më parë”, e mbylli deklaratën e tij sulmuesi kurbinas Saimir Hasani. Ai i referohet të dashurës së tij në rastin konkret dhe pret që të kthehet në Shqipëri për të qenë më afër saj. Ndërkaq, pritet që në ditët në vazhdim te Besëlidhja të zyrtarizohen edhe afrimet e para në këtë merkato janari. Synimi i lezhjanëve është që të krijojnë një ekip cilësor për pjesën e dytë të kampionatit. Objektivi primar është 5-shja e parë pas dy fazave të para dhe më pas të luftohet për vendin e parë që të dërgon në Superiore.