Bind Kukësi, Shkurtaj dhe Çyrbja e bëjnë me krahë
Sulmuesi gjen golin, mesfushori "abonohet" në tokën turke
Vasil Shkurtaj gjeti golin e tij të parë me fanellën e Kukësit dhe ky fakt ka çliruar jo vetëm klubin që shpenzoi 70 mijë euro për kartonin e tij, por edhe vetë sulmuesin. Vlonjati në deklaratën e dhënë për "Panorama Sport" paralajmëron se ky është vetëm fillimi për të, pasi ka shumë më shumë për të dhënë. "Jam i kënaqur me fazën përgatitore dhe me ndeshjet e zhvilluara...
Kukësi merr fitoren e parë për këtë vit. Pasi humbi 2-1 me Bashaksehirin e Arda Turan dhe barazoi ndaj Rostovit, verilindorët kanë mposhtur kazakët e Shaktjor Karagandit. Miqësorja e luajtur në orën 15:00 " O Sport Center" ka përfunduar me shifrat e pastra 2-0 për llogari të shqiptarëve. Nënkampionët e Shqipërisë kanë bindur në lojë, duke dominuar krejt 90minutëshin e zhvilluar. Armando Cungu kishte hedhur në fushë formacionin më të mirë, me Vasil Shkurtajn në majë të sulmit. Duket se trajneri e ka bërë zgjedhjen e tij, duke i besuar fanellën e titullarit vlonjatit të ardhur rishtas në ekip. Sulmuesi e përligji më së miri besimin, duke shënuar të parin gol me fanellën e Kukësit. Sakaq, ndeshjen e vendosi i zakonshmi Arbër Çyrbja, i cili duket se është abonuar me rrjetat në tokën turke.
NDESHJA - Loja nis me ritëm për të dyja skuadrat, por me Kukësin disi më kërkues. Agresiviteti në sulm bëri që skuadra të zhbllokonte shifrat që në minutën e 9të, pas një goditjeje perfekte brenda zonës. Me rezultatin 1-0, verilindorët fitojnë qetësinë dhe rrjedhimisht shfaqen më të saktë në pasime dhe ndërtimin e aksioneve. Mendon Arbër Çyrbjen, autori i dy golave në miqësoret e zhvilluara tokën turke, që të sjellë qetësinë verilindorëve. Kur kronometri shënonte minutën e 43-të, mesfushori tregoi edhe një herë aftësi prej golashënuesi, duke dhënë spektakël brenda zonës dhe nxjerr huq fillimisht një mbrojtës dhe më pas portierin e kazakëve. Minutat e mbetura nuk sjellin
më surpriza dhe Kukësi i drejtohet dhomave të zhveshjes me një fitore të pastër. Në pjesën e dytë të takimit nuk ndryshoi asgjë, edhe pse të dy trajnerët u munduan që të freskonin skuadrat duke aktivizuar lojtarë nga stoli. Armando Cungu u dha minuta lojtarëve të tjerë që kishte në dispozicion, përfshi edhe Arturo Rexhinaldon. Sulmuesi pati rastet e tij në këtë test, por nuk mundi dot që të gjente golin dhe për rrjedhojë krejt takimi u mbyll me golat e shënuar që në 45-minutëshin e parë. Pas humbjes me Bashaksehirin dhe barazimit ndaj Rostovit, kjo fitore me lojë bindëse u jep shpresë drejtuesve dhe stafit për një të ardhme më të ndritur.