Debutojnë Rexhepi dhe Duka, mbrojtësi bind që në start
Mesfushori e nis titullar, por dëmtohet
Lum Rexhepi dhe Dilaver Duka debutojnë me fanellën e Partizanit në miqësoren e luksit kundër Dinamos së Zagrebit. Mbrojtësi kosovar i lindur në Finlandë dhe mesfushori shqiptar me nënshtetësi amerikane luajtën gati nga një pjesë loje secili. Duka e nisi titullar, duke u pozicionuar pas sulmuesit kryesor, Bardhi. Në fakt, roli i tij natyral është mesfushor krahu, por trajneri Gega kërkoi që të shikonte Dukën në kushte loje, pikërisht pas sulmuesit. Ajo që ra në sy ishte gjendja jo e mirë fizike e ish-lojtarit të Çikago Fajer, Kolumbus, Montreal Impakt dhe Nju Jork Red Bull në Amerikë. Mesfushori nuk është përshtatur ende me ekipin e ri, ndërsa në minutën e 40-të la fushën pas një kontraktimi muskulor. Duka vjen pas një dëmtimi dhe nuk është ende në 100 për qind për të përballuar ngarkesa si pjesa tjetër e grupit. Ndërkohë, për qendërmbrojtësin Rexhepi mund të thuhen fjalët më të mira për ndeshjen e tij të parë me fanellën e kuqe. Shtatlarti luajti në 45 minutat e dyta, duke dhënë sinjale pozitive, sidomos në lojën me topin, ku tregoi saktësi. Praktikisht, asnjë gabim dhe një notë pozitive për këtë paraqitje të parë me "demat". Mbrojtësi që ka luajtur edhe dy ndeshje me Kosovën, si dhe ka qenë pjesë e përfaqësueseve të moshave të
Finlandës iu bashkua ekipit vetëm të dielën. Dje klubi i kuq njoftoi përmes faqes zyrtare edhe marrëveshjen me 26-vjeçarin, i cili ka firmosur një kontratë 6-mujore me të drejtë rinovimi për një sezon
tjetër. Mësohet se Rexhepi do të marrë 3500 euro në muaj. Së fundmi, ai ka qenë pjesë e Kupës në Finlandë, ndërsa është pikasur nga Gega dhe klubi arriti menjëherë marrëveshjen.