Luftëtari fuqizon mbrojtjen, vjen kosovari Mërgim Neziri
Luftëtari ka bërë dje afrimin e dytë në merkaton e janarit. Pas firmës me mesfushorin Realdo Fili, që erdhi nga Skënderbeu, gjirokastritët arritën marrëveshjen edhe me mbrojtësin kosovar që ka lindur në Gjermani, Mërgim Neziri. Ky i fundit nuk është një emër i panjohur për kampionatin shqiptar, pasi jo më larg se sezoni i kaluar ka qenë pjesë e Kamzës, ku në dy fazat e para luajti 13 ndeshje dhe më pas në janar të vitit 2018 prishi kontratën. "Panorama Sport" mëson nga burime zyrtare në klubin bluzi se Neziri erdhi
në mbrëmjen e së hënës në Gjirokastër dhe pas firmosjes së kontratës, sot pritet t'i bashkohet ekipit. Mësohet se marrëveshja me kosovarin pritet të jetë 18-mujore, edhe pse në klub nuk japin detaje. Neziri është 25 vjeç dhe ka një të kaluar në Gjermani,
ndërsa në pjesën e parë të këtij sezoni ka qenë pjesë e klubit të njohur rumun, Petrolul Ploeshti. Duke qenë se gjeti pak hapësira, teksa u aktivizua vetëm në 3 ndeshje, Neziri prishi kontratën me Petrolulin. Mbrojtësi që luan në të dyja krahët, por më tepër në të majtë, aty ku ka edhe rolin natyral është aktivizuar në Rumani edhe me skuadrën e Botoshanit në sezonin 20152016. Pesë vite më parë, Neziri ka qenë pjesë edhe e Kombëtares U-21 të Shqipërisë. Ndërkohë, 25-vjeçari është rritur në akademinë e Karlas- ruhes dhe Frajburgut për të luajtur më pas në Regionaliga me VFR Alen dhe Nuremberg II. Ardhja e Nezirit shton konkurrencën në repartin difensiv të bluzinjve, aty ku viti 2018 u mbyll me Rapën dhe Xheksonin titullarë nga krahët, por gjithashtu është
përdorur edhe Demo. LËVIZJET
Kjo javë është vendimtare për lëvizjet në hyrje në klubin gjirokastrit. Burime të gazetës pranë drejtuesve tregojnë se po negociohet me dy futbollistë të huaj, njëri mesfushor organizator dhe tjetri sulmues, të cilët kanë qenë pjesë e ekipeve greke në këtë sezon. Gjithashtu, po shikohet me vëmendje edhe tregu kosovar për të pikasur ndonjë element që mund të ndihmojë skuadrën në pjesën e mbetur të sezonit. Ndërkohë, duket se po sfumohet pista për fantazistin Erjon Vucaj, pasi klubi i Dritës së Gjilanit nuk po i jep letrat mesfushorit shkodran, i cili nëse ikën nga Kosova është i detyruar të luajë për Luftëtarin, pasi e ka nisur sezonin me gjirokastritët dhe ka konsumuar dy transferime. Sipas rregullit të FIFA-s, nuk mund të luajë në tri ekipe brenda një sezoni.