Skënderbeu, sondazh për dy boshnjakë
Trajneri bardhekuq kërkoi mesfushorë, klubi nis bisedimet
Skënderbeu duket se ka filluar të lëvizë në merkaton e janarit për ti dhënë trajnerit Orges Shehi lojtarët që i nevojiten në plotësimin e reparteve të ndryshme të fushës. Mesfusha është reparti ku kampionët e Shqipërisë kanë më shumë nevojë se kudo tjetër, kjo jo vetëm për faktin se ishin të pakët në numër që prej fillimit të sezonit, por edhe si pasojë e dëmtimeve të fundit që kanë zbrazur më së shumti repartin e bardhekuqve. Për këtë arsye, klubi korçar ka filluar të lëvizë në këtë merkato për të afruar lojtarët e nevojshëm për Shehin. Së fundmi, burime pranë klubit bëjnë me dije se përmes menaxherit të merkatos, Haris Fakiç, korçarët kanë filluar kontakte me dy futbollistë boshnjakë që për momentin janë pa ekip. Bëhet fjalë për 28-vjeçarin Adnan Zahiroviç dhe 24-vjeçarin Todor Petroviç. Të dy këta futbollistë duket se kanë rënë nën lupën e bardhekuqve që mund të shfrytëzojnë kartën Haris Fakiç. Duke qenë se drejtori i merkatos së korçarëve është nga Bosnja, atëherë mund të hyjë në lojë karta e bashkëkombësve për të bindur të paktën një nga dy lojtarët. Ajo që mbetet për tu parë është se sa do të arrijë klubi korçar tu mbushë mendjen futbollistëve në fjalë dhe mbi të gjitha forma e tyre, pasi prej disa muajsh janë pa ekip.
ADNAN ZAHIROVIÇ
28-vjeçari Zahiroviç ka qenë pjesë e përfaqësueses së Bosnjës në 14 takime. Bëhet fjalë për një futbollist cilësor në mesin e fushës që ka provuar të luajë jo vetëm në kampionatin boshnjak, por edhe në Rusi, madje edhe në Bundesligën 2 djermane në radhët e Bokumit. Në sezonin e tij më të mirë ka arritur të luajë si titullar në 32 ndeshje në radhët e Spartak Nalcik në kohën kur ishte pjesë e kombëtares së shtetit të tij. Më pas vihet re një rënie në nivelin e tij derisa mbylli sezonin e kaluar me ekipin e Splitit në Kroaci. Sezonin e fundit ka qenë pjesë e Mladostit në Bosnjë Hercegovinë ku ka shkëputur marrëdhëniet në qershor të 2018-ës.
Nga ana tjetër, 24-vjeçari serbo-boshnjak është një gjigant
TODOR PETROVIÇ
i mesfushës me 190 centimetrat e gjatësisë. Ndryshe nga Zahiroviç, Petroviç ka një karrierë më të varfër, kjo për shkak edhe të moshës së tij më të re. Petroviç e ka nisur karrierën e tij në radhët e Zemunit në Serbi, për të kaluar më pas te Sopot po në kampionatin Serb. Paraqitjet e mira e çuan në Spanjë në ligën e tretë te Kserez B e më pas, pas një sezoni përfundoi në Serbi te Vezdovac. Në 106 takime në total të luajtura, Petroviç ka arritur të shënojë dy gola, të dyja në ligën serbe. Pritet tashmë që korçarët të vijojnë tratativat me dy lojtarët në fjalë për të parë se kush do të jetë i zgjedhuri i tyre. Ndoshta e vetmja pengesë për të afruar të dy mesfushorët është shtimi i lojtarëve të huaj që do të ishte një thikë me dy presa për Skënderbeun.