Ish-lojtari i Partizanit: Kërkoj vetëm një punë, më takon me ligj

Ilir Xhengo i bën thirrje shtetit që t'i sigurojë një vend

Një aksident i rëndë, gjithçka e shkatërruar dhe më pas shumë vite për t'u ringritur. Ilir Xhengo ishte në fillimet e karrierës së tij si futbollist dhe kishte ëndrra të mëdha. Por, një aksident me makinë në 1993-in ia ndërpreu gjithçka në mes. Xhengo mbetet i paralizuar dhe pas shumë vitesh pune riaftësuese, ia del që të ringrihet. Në një prononcim për gazetën "Panorama Sport", Xhengo tregon historinë e tij dhe bën një thirrje për institucionet shtetërore.

- "Në klasën e 3-të më morën në klasën sportive për sportin e volejbollit, ndërsa në klasën e 7-të u regjistrova te klubi Partizani me trajner Luke Shaqirin duke bërë çdo ditë stërvitje tek ish-Fusha e Aviacionit. Në qershor të 1985-ës u zhvilluan finalet e Spartakiadës, të cilën e fitoi Partizani. Në 4 ndeshje skuadra shënoi 8 gola, nga të cilat shtatë mbajnë firmën time. Ndërsa në maj 1989 më morën tek ekipi kombëtar i të rinjve. Më vonë luajta me Shpresat e Partizanit, deri në vitin 1992, kur Neptun Bajko, i cili drejtonte Dinamon më mori për të luajtur atje. Në këtë kohë fillova kursin e patentës, ndërsa prindërit më blenë një makinë, derisa më 26 mars 1993 pësova aksident. Nuk kisha mbushur ende 21 vjeç", tregon fillimisht Xhengo. Më tej ishlojtari i Partizanit vazhdon: "Por kjo më ka bërë më të fortë. Me stërvitje intensive dhe me punë, unë arrita që të bëhesha pjesë e Institutit të Fizkulturës. Kjo gjë ka ndodhur në vitet 2000-2001. Ajo që unë kërkoj është punësimi, pasi me ligjin aktual për punësimin është shumë e rëndësishme që unë të jem në punë. Por ajo që është problematike ka të bëjë me faktin se ligji nuk më përkrah mua dhe personat si unë. Aktualisht jam pa të ardhura të mjaftueshme. Nuk kam mik. Marr një pension me vetëm 110 mijë lekë të vjetër në muaj", përfundoi prononcimin e tij Ilir Xhengo.