Gatuzo: Higuain do përkëdhelur, por nëse i shënon Juves...
Higuain vazhdon të mbetet qendra e universit kuqezi, mes mijëra zërash merkatoje dhe pritshmërish lidhur me finalen e nesërme, por edhe mbi të ardhmen e karrierës së lojtarit. Xhenaro Gatuzo tashmë e ka kuptuar që pak gjëra varen nga ai, ndaj në pritje të Superkupës, duke folur për SKY, u mundua të karikojë bomberin: "Është më se normale që në momente si këto, thashethemet dhe lajmet vijnë të ndryshme nga të katërta anët. Gonzalo nuk mund të bëjë asgjë, përveçse t'i pranojë. Si ekip duhet të mendojmë për Superkupën. E dimë që do të jetë e vështirë, por po punojmë për të sjellë turneun në shtëpi. Uroj që t'ia dalim mbanë e që njëkohësisht Higuain të arrijë ta dërgojë topin në rrjetë. Me një gol vendimtar mund të ndryshonin shumë gjëra".
RËNIA - Megjithëse i pranishëm në një event me qëllime reklamuese, pyetjet për bomberin argjentinas janë edhe më të shumta se ato në lidhje me ndeshjen e nesërme kundër Juventusit. Gatuzo i rikthehet temës, teksa shpjegon: "Pas humbi atë 11metërsh kundër Juventusit, Gonzalo u shpërqendrua disi, por mendoj se ishte një pasojë normale dhe e pritshme e asaj që ndodhi në fushë nga ku u largua me karton të kuq. Sikur të mos mjaftonte ajo ndeshje e mbrapshtë, Gonzalo u skualifikua dhe mendoj se ishte e drejtë. Në ditët që pasuan Higuainin e gjykuan të gjithë dhe kritikat negative e mbuluan, por ishte normale sepse kur një futbollist reagon negativisht në fushë, më pas i duhet të marrë përsipër edhe përgjegjësitë e tij. Vuajti jo pak për të dalë nga ai tunel mendimesh jo të mira dhe ishte i lënduar. Tani e shoh më të qetë. Në këtë moment na duhet t'i qëndrojmë pranë dhe për sa kohë do të bëjë profesionistin, askush nuk mund ta kritikojë. Ka nevojë të ndihet i rëndësishëm dhe duhet ta përkëdhelim, madje edhe t'i bëjmë ndonjë vërejtje, që mbase nuk do t'i pëlqejë. Ja që kjo është një pjesë e punës sime. Me Gonzalon kam një raport të sinqertë dhe të drejtpërdrejtë. Ai ka moshën e duhur për t'u shprehur në një mënyrë të caktuar, më pas do të shohim çfarë do të ndodhë".
NDESHJA - Nesër janë shumë aspekte në lojë, jo vetëm ndeshja, fitorja, por edhe morali nëpërmjet trofeut. Superkupa mund të jetë trofeu i parë për Gatuzon që vendos veten në plan të dytë: "Për mua nuk ka rëndësi fakti që mund të jetë trofeu i parë si trajner. Aktualisht kam të tjera gjëra në kokë, duhet të përgatisim sa më mirë ndeshjen sepse pengesa është e madhe e unë nuk kam kohë të mendoj për veten. Jam i ri, e kam nisur herët zanatin, ndaj do të mundohem të bëj sa më pak dëme. Sidoqoftë, të tilla pragndeshje i përjetoja më fort kur isha futbollist".