Superkupa, Alegri frikë penalltitë

4 nga 8 finalet e luajtura kanë përfunduar me 11-metërsh, 3 kanë shkuar për Milanin

Juventusi dhe Milani do të përplasin brirët nesër në Zhedah të Arabisë Saudite për Superkupën e Italisë. Dy nga skuadrat më të mira të Serisë A kanë filluar përgatitjet fill pas përfundimit të ndeshjeve të Kupës së Italisë që u luajtën në fundjavë. Juventusi fitoi pa vështirësi në transfertën e Bolonjës, ndërsa Milani vuajti jo pak në Xhenoa, teksa arriti të kualifikohej vetëm në kohën shtesë me dy golat e shënuar nga Patrik Krutone. Ndërkohë, në kampin bardhezi, trajneri Masimiliano Alegri po merr të gjitha masat për të dalë me trofe nga ky takim ndaj kuqezinjve. Tekniku nuk do të ketë në dispozicion mbrojtësit, BarzalhiBenatia, sulmuesin Mandzukiç dhe mesfushorin Kuadrado. Kjo ka bërë shumë konfuz trajnerin italian për formacionin e parë, me të cilin do të luajë. Kanselo është rikthyer në krahun e djathtë të mbrojtjes që do të plotësohet nga dyshja Bonuçi-Kielini në qendër dhe Aleks Sandro në krahun e majtë. Në mesfushë Pjaniç, Bentankur dhe Matuidi do të formojnë mesfushën bardhezi. Bernardeski dhe Duglas Kosta janë në balotazh dhe vetëm njëri prej tyre do mund ta nisë ndeshjen nga minuta e parë. Ronaldo dhe Dibala do të plotësojnë repartin e sulmit ndaj kuqezinjve.

Trajneri Alegri nuk kërkon t'ia lërë ndeshjen rastësisë dhe në rastin më të keq bardhezinjtë mund të mposhten nga "lotaria" e penalltive. Frika nga një dështim tjetër me Milanin ka detyruar teknikun e kampionëve të Italisë të qëndrojë edhe disa minuta më shumë në fushën e stërvitjes për të përmirësuar shënjestrën nga pika e bardhë. Kujtojmë që katër nga tetë finalet e luajtura midis Juventusit dhe Milanit kanë përfunduar në gjuajtjen e penalltive. Milani ka fituar 3 herë nga katër. Bardhezinjtë kanë triumfuar vetëm një herë.

FRIKË NGA PENALLTITË