Atalanta gjen Juven me Gjimshitin, Roma pret biletën për... 20 sekonda

E zgjidh përsëri ai. I pandalshmi Duvan Zapata në minutën e 88të. Atalanta do të gjejë Juventusin në Torino më 30 qershor, në çerekfinalen e Kupës së Italisë, kompeticion që Xhan Piero Gasperini ka ëndrra të mëdha. Me një tjetër gol të kolumbianit, 10 gola radhazi (13 sezonalë) mes kampionatit dhe kupës. Atalanta, pa Berishën në portë, për shkak të problemeve shëndetësore, por me Gjimshitin, i cili luajti gjithë ndeshjen (në 81' u ndëshkua edhe me karton të verdhë dhe "Tuttomercatoweb" i vendos notën 6 me motivacionin: "Sulmi i Kaljarit nuk kaloi ditën e tij më të mirë dhe ai përfitoi"), kaloi me sukses sfidën me Kaljarin me një fitore 2-0 (Pasaliç mbylli llogaritë në minutën e tretë shtesë), e cila lë një shije shumë të hidhur për sardët, të cilët shpresuan deri në fund. Por, në momentin që humbën Lenoardo Pavoletin, nuk patën më të njëjtën potencial sulmues. Pjesa e parë përfundoi nën shenjën e ekuilibrit, me Barelën që dhuroi ndonjë shkëndijë, edhe pse Atalanta e nisi me dy goditje në dy minuta. Kur të gjithë po bënin llogaritë me shtesën, vjen goli i bergamaskëve: në 88' Hatebor kroson, Kastanj provon kthesën dhe topi shndërrohet në asist për Duvan, i cili firmos kualifikimin e merituar. Sepse Atalanta në fund krijoi më shumë. Pastaj, Pasaliç vulosi gjithçka me golin e dytë. Atalanta fiton kështu të drejtën të luajë kundër Juventusit në çerekfinale.

Roma - Gjithçka sipas pritshmërive në duelin përmbyllës të fazës së 1/8-ave të Kupës së Italisë. Virtus Entela, skuadra e Serisë C, nuk rezistoi as një minutë të plotë në "Olimpico" përballë Romës. Patrik Shik zhbllokoi rezultatin pas 20 sekondash dhe i dha edhe pasimin e fundit Markanos në shtesën e pjesës së dytë (45+2'), i cili e dërgoi të qetë skuadrën e Di Françekos në dhomat e zhveshjes. Dy minuta pas kthimit të skuadrave në fushë, sulmuesi çek gjeti edhe golin e dytë personal dhe të tretin për Romën, ndërsa biletën për në çerekfinale e vulosi përfundimisht Pastore në 75'. "Pokerin" e zbehën vetëm koret diskriminuese të tribunës jugore, me thirrjet e urrejtjes kundër Napolit, Juves, Liverpulit dhe karabinierëve. Në turin e ardhshëm, kundërshtari do të jetë shumë herë më i fortë, pasi kryeqytetasit do të udhëtojnë në shtëpinë e Fiorentinës.