Tomorri e pranon: Duhet merkato për titullin

"Nëse nuk përforcohemi, vështirë t'i konkurrojmë rivalët"

Partizani në volejboll për meshkuj e mbyl li fazën e parë në vendin e pestë, duke pasur një ecuri jo të mirë në këtë pjesë të parë të sezonit. Megjithatë, faza e dytë pritet të jetë shumë e nxehtë dhe me një rivalitet të lartë në luftën për "play-off". Në një intervistë për "Panorama Sport", trajneri Ylli Tomorri flet për gjendjen e ekipit kryeqytetas dhe pranon se nëse në skuadër nuk do të ketë afrime, Partizani nuk do të jetë në gjendje për të luftuar për titullin kampion. Tomorri gjithashtu komenton edhe paraqitjen e kombëtares në eliminatoret e Europianit, të cilat përfunduan vetëm disa ditë më parë.

Si është gjendja aktuale në skuadrën e Partizanit?

Përveç të ftohtit të këtyre ditëve të fundit, çdo gjë shkon mirë. Skuadra po stërvitet me intensitet në kohën e duhur. Djemtë po punojnë dhe po sakrifikojnë, por mund të them që i ftohti ka qenë një pengesë e madhe në këtë periudhë, pasi temperaturat e ulëta e bëjnë të vështirë të luash volejboll në këto ditë, por s'kemi çfarë të bëjmë, pasi kjo gjë nuk varet nga ne.

Çfarë prisni nga faza e dytë e kampionatit?

Faza e dytë e kampionatit do të jetë krejtësisht e ndryshme nga faza e parë si për

ne, ashtu edhe për kundërshtarët tanë. Arsyet janë të ndryshme, por një nga arsyet kryesore është që tani bëhet më e nxehtë beteja për titullin dhe natyrisht që ekipet do të përforcohen dhe do të dhurojnë të tjera performanca. Kështu që kjo pjesë e kampionatit nuk mendoj që do të jetë e vakët si faza e parë, parashikoj një garë dhe një luftë të fortë sportive nga të gjitha ekipet.

A do ndërhyjë Partizani në merkato?

Si të gjitha ekipet e tjera, edhe ne sigurisht që do të bëjmë lëvizjet tona për të

qenë sa më të gatshëm në përballimin e fazës së dytë.

A ka potencial skuadra juaj për të synuar në fitimin e titullit kampion?

Nëse do të kemi përforcime, të cilat nëse vijnë, do të rrisin performancën e skuadrës apo kërkesën duke e ngritur nivelin e ekipit. Por nëse nuk do të kemi afrime në ekip, atëherë mendoj që Partizani nuk do të jetë pretendent për titull, por do të punojë në rritjen e lojtarëve me perspektivë që aktualisht janë pjesë e ekipit të Partizanit.

Si do ta komentonit paraqitjen e ekipit tonë kombëtar në kualifikueset e Europianit, të cilat u mbyllën vetëm para disa ditësh?

Jam i mendimit që ne kemi një skuadër shumë të mirë kombëtare. Janë djem me të ardhme, të cilët nëse përkrahen, menaxhohen mirë apo nëse arrijnë të kenë atë shtysë, siç e kanë pasur të tjerët përpara, mendoj që mund të arrijnë shumë larg. Është një skuadër vërtet shumë e mirë.

Çfarë mendoni që na mungon që edhe ne të arrijmë një kualifikim në Europian, që do të ishte diçka shumë e madhe për volejbollin shqiptar?

Ne ishim shumë afër për ta arritur këtë kualifikim që në këto eliminatore, por mendoj që mungesa e besimit dhe e përkrahjes na ka penalizuar. Mendoj që në sport nuk punohet me fushata sot për sot apo nesër për nesër. Duhet të kesh vizion dhe parametra, siç i kanë skuadrat e tjera. Ne kemi një brez lojtarësh të rinj shumë të mirë dhe natyrisht që duhet të mbështetemi te këta lojtarë, nëse duam që të arrijmë një kualifikim, të cilin për hir të së vërtetës edhe mund ta arrijmë sepse nuk është diçka e paarritshme. Ne duhet të qëndrojmë me këmbë në tokë dhe duhet patjetër që të jemi vizionar, duke e filluar punën që me fëmijët apo me ekipet e të rinjve. Nuk shikoj të kemi shumë elementë tek ekipet e moshave dhe mendoj që aty duhet të investohet më shumë dhe të punojnë me këtë brez specialistë të aftë dhe jo njerëz që janë aty sa për të marrë një rrogë. Duhet patjetër që ne të arrijmë ta ngremë volejbollin në ato nivele që e kemi pasur dikur, pasi në Shqipëri ka njerëz që e dashurojnë këtë sport.