Juvja nuk fal, vijnë gjobat për Kostën e Dibalën
Ndëshkime monetare për dy sulmuesit, por edhe paralajmërime me largim nëse përsëriten
Paulo Dibala dhe Du glas Kosta përpara “trupit gjykues bardhezi”. Dy sulmuesit janë thirrur dje në apel në zyrën e presidentit Andrea Anjeli në lidhje me sjelljet e ofruara prej tyre në fundjavë. Argjentinasi ishte protagonist i një nervozizmi të tepruar në minutat finale të sfidës kundër Parmës. Teksa ishte në nxehmje, në minutën e 85-të të sfidës, kur pa se ai nuk do të ishte zëvendësimi i tretë i trajnerit Masimiliano Alegri, në mënyrë demonstrative ka vendosur që t’u drejtohet dhomave të zhveshjes dhe jo të ulet në stol, me pjesën tjetër të skuadrës. Ndërsa braziliani ishte protagonist jo vetëm i një aksidenti me makinë, duke rrezikuar edhe më shumë fizikun e tij pas problemit muskulor që e detyroi të linte pas pjesës së parë duelin me Parmën, por ai nuk ka nguruar që ditën e pushimit, të dielën, të merrte avionin dhe të ishte prezent në festën e ditëlindjes së 27-të të Nejmarit. Një sjellje aspak profesionale nga ana e tij, por mbi të gjitha pa marrë leje në klub për këtë lëvizje. Të gjitha këto situata nuk janë nga ato që pëlqehen shumë te Juventusi, duke qenë se rregulli i parë në klubin bardhezi është “lojtarët janë pamja serioze dhe profesionale e klubit”. Në këtë mënyrë, duke parë edhe jehonën e madhe që këto dy lajme kanë bërë ditët e fundit në Itali, por edhe në Europë, presidenti Anjeli nuk ka nguruar që të presë në zyrën e tij Dibalën dhe Kostën, me të cilët tonet nuk kanë qenë aspak të buta. Përkundrazi, në zyrën e “bosit” juventin janë lajmëruar gjobat për të dy futbollistët, por në të njëjtën kohë edhe paralajmërime të ashpra, deri në largimin e tyre. Kjo e fundit lidhet mbi të gjitha me Paulo Dibalën, duke qenë se pas sjelljes arrogante të lojtarit, ditën tjetër qarkulloi lajmi se vëllai-menaxher, Gustavo, ishte parë në Paris, duke ndezur zërat për bisedime me PSG-në, edhe pse duhet nënvizuar se Gustavo është shok i ngushtë me ish-mbrojtësin bardhezi, Daniel Alvesh, aktualisht pjesë e gjigantëve transalpinë.