Daja-Memës: E ke parë ndonjëherë majën e trekëndëshit të Bermudës?
Tifozët e Flamurtarit ofendojnë gjyqtarët dhe tentojnë të zbresin në fushë
-Administratori i Flamurtarit Sinan Idrizi mungonte dje në stadium. Idrizi mësohet se ishte në Turqi, ndërsa zëvendësohej nga anëtari i bordit, Robert Islamaj. Në tribunë ishte presidenti i Tiranës, Refik Halili. -Shumë pak tifozë në shkallët e stadiumit "Flamurtari" në ndjekje të ndeshjes mes Flamurtarit dhe Tiranës. Ishin rreth 100, ndërsa numri i ulët lidhet edhe me orën e papërshtatshme të zhvillimit të ndeshjes. -Ultrasit e Tiranës hyjnë në stadium në minutën e 34-të të ndeshjes. Nuk dihet se përse ata u vonuan, ndërsa ishin të paktë në numër. Në minutën e 39-të Ilir Daja i tërheq vëmendjen Albi Allës. -Në pushim të pjesës së parë të ndeshjes, tifozët e Flamurtarit kapen me gjyqtarin. "O Laver, o Cjapi lërini të luajnë". -Në pushimin e pjesës së parë të ndeshjes, Halili për dy minuta shikon ekipin teksa po futej në tualet dhe më pas i drejtohet lokalit për të pirë kafe. -Në minutën e 61-të, anëtari i bordit,Roberti Islamaj,i drejtohet nga tribuna portierit të Tiranës. "Ore, qenke më keq se Ilion Lika ti1!" Sukaj debuton me fanellën e Flamurtarit. Sulmuesi shkodran do të mbajë fanellën e Bushiçit me numër 9. -Në minutën e 71-të Veliu hedh topin teK aneksi i stadiumit. Një tifoz reagon pas kësaj: "Vajti nga gjitoni". -Tension në fund të ndeshjes mes Flamurtarit dhe Tiranës. Tifozët ofendojnë në kor gjyqtarët, ndërsa tentojnë që të zbresin edhe në fushë. Por është policia që ndërhyn për të qetësuar situatën. -Pas ndeshjes, trajneri Ilir Daja përqafohet përzemërsisht me trajnerin e Tiranës, Ardian Mema, të cilin e ka pasur ndihmës në Korçë dhe në Vlorë. Por nuk kanë munguar as batutat. Pasi përqafohen, Mema i thotë Dajës. "Hë kush është më shumë tiranas tani?" Ndërsa Daja ia kthen: "E ke parë trekëndëshin e Bermudës ti? E ke parë ndonjëherë majën lart… Shikoje". -Autobusi i vjetër i Flamurtarit largohet nga vendi ku qëndronte prej vitesh. Bashkia e Vlorës ka hequr autobusin nga ky vend, ndërsa operacioni i largimit të tij është zhvilluar gjatë paradites dhe ka zgjatur për 45 minuta. Ishte Ndërmarrja e Shërbimeve Publike e Bashkisë ajo që drejtoi operacionin, i cili ishte i vështirë edhe për shkak të vjetërsisë së autobusit dhe që duhej kujdes. Autobusi është i kohës kur Flamurtari fitoi Kupën e Shqipërisë nën drejtimin e trajnerit Eqerem Memushi. Mjeti është transportuar në ambientet e Parkut Urban.