"Shkurtaj-Rexhinaldo, jo zgjedhje e duhur për ta nisur me të dy"

Trajneri Armando Cungu ka qenë mjaft i preokupuar gjatë javës për mbarëvajtjen dhe rezultatin e ndeshjes së dytë ndaj Apolonisë. Pa dyshim sfida e djeshme i dha të drejtë, pasi vështirësia për të arritur te kualifikimi ishte i madh. Në fund të ndeshjes trajneri shkodran e komentoi kështu për mediat takimin me Apoloninë: "Ndeshja nuk ishte e thjeshtë, për shkak edhe të rezultatit të takimit të parë. Edhe në këtë sfidë kundërshtari kishte menduar më shumë për mbrojtjen dhe rreshtohej me shumë forca mbrapa. Ishin 11 futbollistë afër zonës së tyre dhe ishte e vështirë t'i çaje. E njëjta gjë na ndodhi edhe në Fier. Sa për mungesat, nuk është justifikim për të mos qenë më i bukur në zhvillimin e lojës. Kishim momente jo të mira, kishim pasiguri, si rezultat edhe i mungesave të rëndësishme, si Uilliam dhe Dzaria që na jep ekuilibër. Në këto kushte, çaluam disi. Shto këtu edhe presionin. Futbollit nuk i dihet kurrë, me djem të rinj dhe kur nuk ke çfarë humb mund të ketë edhe surpriza". Kundër Apolonisë trajneri aplikoi një skemë të re, e risi ishte aktivizimi i dy sulmuesve Shkurtaj e Rexhinaldo njëkohësisht, por Cungu nuk e shikon si modul për vazhdimësinë. "Nuk është çështje hipoteze sulmi me dy, e kam provuar dhe në Turqi. E provova dhe në ndeshjen e parë në Fier, por kjo nuk do të thotë se nuk do të provojmë dhe në kampionat. Por, për të filluar takimin me dy, nuk mendoj se është zgjedhja e duhur. Janë lojtarë të ndryshëm dhe duan kohën e tyre për t'u përshtatur. Koha jonë nuk pret dhe zgjedhjet e mia dihen", u shpreh trajneri Cungu. Debutimi i Valdet Ramës pritej me shumë interes dje. "Është një lojtar që nuk ka nevojë për reklamë. Është një futbollist me kualitet, e shihni dhe ju mënyrën se si ai luan dhe pason për shokët. Unë thjesht shoh gjendjen e tij fizike. Me aq sa kemi biseduar, na ka thënë se është stërvitur, por gjithçka do t'ia lëmë kohës", u shpreh Cungu.